QSZI: Azamattardyń basym bóligi eldiń saıası baǵyty men turaqtylyǵyna senedi
ASTANA. KAZINFORM — Bıyl qazan aıynda Qazaqstan strategııalyq zertteýler ınstıtýtynyń tapsyrysy boıynsha áleýmettik saýalnama júrgizilgen. Nátıjesi qazaqstandyqtardyń 81,1%-y saıası kýrsqa qoldaý bildiretinin ári eldiń durys baǵytta damyp kele jatqanyna senimdi ekenin kórsetken. Bul týraly QSZI málim etti.
Áleýmettik-demografııalyq taldaý kórsetkendeı, eń joǵary áleýmettik optımızmniń deńgeıi dástúrli túrde jastar arasynda basym. 18–29 jas aralyǵyndaǵy respondentterdiń 85,5%-y elde júrgizilip jatqan reformalardy qoldaıtyndaryn bildirgen.
Aýyl turǵyndary eldiń damý baǵytyn baǵalaýda neǵurlym optımıstik kózqaras tanytty — olardyń 84,3%-y eldiń durys baǵytta damyp kele jatqanyn atap ótti. Al qala turǵyndary arasynda bul kórsetkish 79,1%-dy quraıdy.
Jynystyq turǵydan alǵanda, áleýmettik optımızm deńgeıinde aıtarlyqtaı aıyrmashylyq baıqalmaıdy: erlerdiń 80,5%-y jáne áıelderdiń 81,7%-y eldiń damý baǵytyn oń baǵalaıtynyn kórsetken.
— Azamattardyń saıası kýrsqa qanaǵattanýshylyq deńgeıin aıqyndaıtyn mańyzdy kórsetkishterdiń biri eldegi turaqtylyqty baǵalaý. Turaqtylyq áleýmettik-ekonomıkalyq damý men jeke ál-aýqattyń negizgi sharty bolyp tabylady. Osyǵan baılanysty saýalnamada bul taqyrypqa arnalǵan jeke suraqtar blogy engizildi, — delingen habarlamada.
Qazaqstandyqtardyń basym bóligi eldegi jaǵdaıdy turaqty dep sanaıdy. Respondentterdiń 74,6%-y Qazaqstanda turaqtylyq saqtalyp otyr dep esepteıdi. Ásirese jastar arasynda bul kórsetkish 80,6%-ǵa jetedi. Genderlik turǵyda erlerdiń 76,1%-y, áıelderdiń 73,5%-y eldegi ahýaldy turaqty dep baǵalaıdy.
Aýyl turǵyndarynyń arasynda oń jaýaptardyń úlesi 76,7%-dy, al qala turǵyndarynyń arasynda — 73,3%-dy quraıdy. Bul qala men aýyldaǵy qoǵamdyq kóńil-kúıdiń jalpy oń baǵytta saqtalyp otyrǵanyn kórsetedi.
Eske sala keteıik, buǵan deıin halyqtyń 86%-y Qazaqstan Prezıdentine senim bildiretinin jazǵan edik.