QSZI aımaqtarmen yntymaqtastyqty keńeıtedi
Bul týraly Aqtóbede ǵalymdar men sarapshylardyń qatysýymen ótken jıynda atalǵan ınstıtýt dırektory Erkin Tuqymov málimdedi, dep habarlaıdy QazAqparat tilshisi.
Іs-shara barysynda Erkin Tuqymov QSZI-diń Aqtóbe oblysy boıynsha óńirlik ókili taǵaıyndalǵanyn jarııa etti. Bul qyzmetke Q.Jubanov atyndaǵy Aqtóbe óńirlik ýnıversıtetiniń Qazaqstan halqy Assambleıasy jáne áleýmettik-saıası pánder kafedrasynyń dotsenti, saıası ǵylymdarynyń kandıdaty Ashat Keńesov bekitildi.
«Qazirgi tańda aımaqtardy zertteý mańyzdy. Sapaly taldaý durys sheshim qabyldaýǵa múmkindik beredi. Batys Qazaqstanda ózekti máseleler bar. Olardyń sheshý joldaryn tabý kerek. Durys ıdeıalar halyq arasynda týady. Halyqtyń jaǵdaıyn biletin sarapshylar kerek. Zamanaýı zertteýlerdi kabınette emes, aımaqtarda júrgizý qajet», - dedi ınstıtýt dırektory.
Onyń atap ótýinshe, QSZI óńirlerde áleýmettik kóńil-kúıdi baqylaý úshin únemi monıtorıng júrgizip otyrady.
«Biz shıelenis núkteleriniń qaı jerde paıda bolatynyn kórip, problemalardyń aldyn alý boıynsha taldaý jasap, týyndaǵan máselelerdi sheshý úshin óz usynystarymyzdy beremiz. Qyzmetkerlerimiz zertteý jumystaryn júrgizý úshin túrli aımaqtarǵa baryp turady. Áleýmettanýlyq ekspedıtsııalardyń qorytyndysy boıynsha oblystardyń jaǵdaıy týraly esepter men jazbalar daıyndaıdy. Bul jumystyń tıimdi ekenin kórip, ádistememizdi respýblıkalyq deńgeıde keńeıtýdi jón kórdik. Bul QSZI-ǵa «udaıy daıyndyqta» bolýǵa jáne el basshylyǵyna jergilikti deńgeıdegi máselelerdiń sheshimderin ýaqtyly usynýǵa múmkindik beredi», - dedi ol.
Erkin Tuqymovtyń atap ótýinshe, mundaı zertteýlerdi júrgizý úshin óńirlerde QSZI ókilderi bolýy qajet.
«Jergilikti sarapshy jaǵdaı týraly habardar jáne memlekettik organdardyń is-sharalaryna tikeleı qatysa alady. Jaǵdaıǵa qanyq sarapshynyń taldaýy Batys Qazaqstanda bolyp jatqan úderisterdiń egjeı-tegjeıli sıpatyn alýǵa múmkindik beredi», - dedi QSZI basshysy.
Foto: QSZI
