QSZI alǵash ret «qaýipsizdik» jáne «syrtqy saıasat» sanaty boıynsha álemdik «aqyl-oı» ortalyqtarynyń reıtıngine endi
ASTANA. QazAqparat - Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty (QSZI) Dúnıejúzilik saraptamalyq ortalyqtardyń 2015 jylǵa arnalǵan ındeks-reıtıngisinde birden tórt nomınatsııasynda oryn alǵan.
Bul reıtıng 1989 jyldan álemdegi alty myńǵa jýyq «aqyl-oı ortalyqtarynyń» qyzmetin taldaý negizinde saraptamalyq qurylymdardyń jetistikteri men olardyń damý úrdisterin anyqtaý boıynsha Pensılvanııa ýnıversıtetiniń «Saraptamalyq ortalyqtar men azamattyq qoǵam» zertteý baǵdarlamasy aıasynda jasalady.
Reıtıngtiń qorytyndysy boıynsha (https://repository.upenn.edu/think_tanks/10/) QSZI qaýipsizdik, qorǵanys jáne syrtqy saıasat salasyndaǵy 100 eń úzdik zertteý ortalyqtarynyń qataryna endi. Sonymen qatar, ınstıtýt alǵash ret úzdik memlekettik «aqyl-oı» ortalyqtarynyń tizimine endi. QSZI bul tizimde álem boıynsha 57-shi oryndy ıelenip otyr.
Ortalyq Azııadaǵy úzdik saraptamalyq qurylymdardyń arasynda QSZI alǵashqy úshtikke enip, óz ornyn saqtap qaldy, sondaı-aq energetıka jáne shıkizat saıasatyn zertteý salasynda 33-shi orynǵa turaqtady.
Bul kórsetkishter Qazaqstandaǵy saraptamalyq ortalyqtardyń róli artyp kele jatqanyn kórsetedi. Otandyq «aqyl-oı» ortalyqtarynyń jarııalap otyrǵan ǵylymı-sarapshylyq materıaldaryna shetelde jıi silteme jasalady.
Aıta keteıik, QSZI QR Prezıdentiniń 1993 jylǵy 16 maýsymdaǵy Jarlyǵymen quryldy. 2014 jyldyń sáýir aıynan QR Prezıdentiniń Jarlyǵymen Astana qalasyna kóshirildi.
