KSRO-nyń Halyq ártisi: Almaty tsırkin jekeshelendirý - aqylǵa syımaıtyn is
ASTANA. QazAqparat - Keńes Odaǵy tsırkiniń ańyzy, KSRO-nyń Halyq ártisi Vılen Golovko almatylyq tsırkti jeke adamǵa berý úlken qatelik dep esepteıdi. Bul týraly ol búgin Astanada "Azııa jańǵyryǵy" atty tsırk festıvaliniń aıaqtalýyna arnalǵan baspasóz máslıhatynda málim etti.
"Qazir maǵan Almaty týraly oıǵa syımaıtyn dúnıe aıtty - Almaty tsırki jekeshelendirilmek. Basymyzǵa kirip-shyqpaıtyn áreket qoı bul! Tsırk ónerin, ártisterdi, stýdentterdi bireýdiń jeke qolyna berý múmkin nárse me?! Satamyz, bitti depti! Damý bola ma budan keıin?!", - deıdi V. Golovko bul jaıtqa tańdanyp.
Onyń oıynsha, tsırkter qalalyq ákimdikterdiń quramynda emes, QR Mádenıet mınıstrliginiń qaraýynda bolýy tıis.
"Ákimdikter tsırkterdi Mádenıet mınıstrligine bermeı, olardyń barlyǵyna bir adam ǵana jaýapty bolmaıynsha, damý bolmaıdy. Barlyǵy shashylyp jatyr. Ákimdikterge tsırkti qol astynda ustaý tıimdi, biraq olar onyń damýyna úles qosýdy múldem oılamaıdy", - dep atap ótti ol.
Nashar basqarýdyń úlgisi retinde V. Golovko qaraǵandylyq tsırktiń jaǵdaıyna toqtaldy.
"Men anda-sanda ol jerde reseılik kompanııanyń atynan baǵdarlama qoıamyn. Ondaǵy tsırk fılarmonııanyń qaramaǵyna ótip ketken! Tap-tamasha manej tur, orkestr KSRO zamanynan beri saqtalǵan, sahnanyń syrty da bar, janýarlar bólmeleri de joq emes, túptep kelgende tsırktiń jumys isteýine barlyq jaǵdaı qolynda, biraq ol tsırk emes, fılarmonııa. Olar ony jalǵa berip qoıǵan", - dep habarlaıdy V. Golovko.
Vılen Golovko Almatydaǵy qazaq tsırkiniń qalyptasýyna zor úles qosqan óner ıesi. 1975 jyly ol Oljas Súleımenovpen birge Qazaqstan týraly "Ǵajaıyptar álemi" atty baǵdarlama jasaǵan bolatyn. Elimizde bir jarym jyl boıy turǵan ol qazaq aýyldaryn aralap, jas talanttardy izdeýmen aınalysty.
Aıta keteıik, Qazaqstanda tsırk tek Astana, Almaty, Qarǵandy jáne Shymkentte bar.
