«KSRO-nyń áskerı bıleti qoldanysta júr» - respýblıkalyq basylymdarǵa sholý

ASTANA. 19 qazan. QazAqparat - Qazaq aqparat agenttigi respýblıkalyq basylymdarda 19 qazan, juma kúni shyqqan ózekti materıaldarǵa sholýdy usynady.

***

«Qazaqstan Keden odaǵy aıasynda alynatyn tólemder kólemi boıynsha Reseıden 40 paıyzdan astamǵa ozyp ketti. Bul jóninde Konsýltatıvtik keńestiń keden isterin jetildirý máseleleri boıynsha ótken tórtinshi otyrysynda Kedendik baqylaý komıteti tóraǵasynyń orynbasary Igor Ten habarlady», - dep jazady «Egemen Qazaqstan» gazeti. Máselen, basylymnyń atap ótýinshe, ústimizdegi jyl­dyń 9 aıyndaǵy tólem ósimi ót­ken jyldyń sáıkes kezeńimen sa­lystyrǵanda 47 paıyzdy qu­ra­sa, reseılikter bul kórset­kish­ti bar bolǵany 5 paıyzǵa ǵana ulǵaıta alǵan. Bul kórsetkish Qazaqstannyń syrtqy ekonomıkalyq qyzmetine qatysýshylar úshin eldiń tartymdylyǵyn kórsetedi. Maqala «Qazaqstan kedendik tólemder boıynsha Reseıdiń aldyn orady» degen taqyryppen berilgen.

 Keshe Táýelsizdik saraıynda Qazaq­stan hal­qy Assambleıasy men «Álem má­denıet arqy­ly» halyqaralyq qaý­ym­dasty­ǵy­nyń uıym­das­tyrýymen Bú­kil­álemdik rýhanı kelisim kon­gresiniń 20 jyldyq mereıtoıyna arnal­ǵan «Rý­hanı mádenıet ar­qy­ly - dúnıe­júzilik beıbit­shilikke qadam» atty ha­lyqaralyq ǵy­lymı-praktıkalyq kon­­ferentsııa ótti. Oǵan álemniń 27 mem­le­ketinen arnaıy kelgen qo­naq­tar qatysyp, álemde beıbit­shilikti qam­ta­ma­syz etýge baılanysty oılaryn ortaǵa saldy jáne keleli pikir almasty. Bul jaıynda «Egemen Qazaqstan» gazetiniń búgingi sanyndaǵy «Baılanystar kókjıegi keń» degen taqyryptaǵy maqalada keńinen baıandalǵan.

***

Adyrna, asataıaq, dombyra, qylqobyz, shańqobyz, jetigen, jelbýaz sekildi taǵy da basqa kóptegen ulttyq aspaptar búgingi qazaq jasynyń sanasynda ekzotıka esebinde qabyldana bastady. Jańalyqtyń bárin jahandanýdan kóretin kópshilik bul úrdisti de jańa tehnologııaǵa jabýda. Ándi qalyqtatyp qazaq dalasyna qondyrǵan, kúıdi kúmbirletip kókirek kózi oıaý kópke quıǵan bizdiń ádemi ańyzdardyń aýyly alystaǵan saıyn ulttyq ónerimizdiń de órisi taryla túskenin kóremiz. Búgingi realızmniń qataldaý shyndyǵymen betpe-bet kelgen saıyn qoǵamnyń da sıpaty ózgerip, ulttyq qundylyqtar qunynyń jeńildeı túskenine kýá bolýdamyz. Jastardy ulttyq aspaptardan alystatqan qandaı kúsh? Sanaýly ǵana murajaılarda kezdesetin bul qazyna búkil urpaqqa amanat bola ala ma? Mine osy saýaldardyń jaýabyn «Alash aınasy» gazetiniń búgingi sanyndaǵy «Biletinimiz dombyra ǵana ma?» degen taqyryptan taba alasyzdar.

 Osy basylymnyń turaqty «Dat!» aıdarynda «Halal» komıtetiniń tóraǵasy Marat Sársenbaevpen aradaǵy suhbat «Halal máselesinde ózge jurt Qazaqstanǵa qaraıtyn boldy» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Qazaq qazaq bolyp saqtalyp qalǵysy kelse, jegeni, ishkeni, kıgeni, nápaqasy adal bolýy tıis. Sonda ǵana baqytqa keneledi. Sondaı-aq júrekti taza ustaǵan jón. «Júrek taza bolsa, adamnyń óne boıy taza bolady» degen Paıǵambarymyzdyń ósıeti bar. Ol úshin júrekke quıylatyn «tórt bulaqty» taza ustaý kerek. Olar: kóz, qulaq, til, asqazan. Mine, osylardy taza ustap, aramnan tııatyn bolsa, júregimiz tap-taza, jasaǵan duǵa-tilegimiz qabyl, elimizdiń bolashaǵy jaryq bolady», - deıdi. 

                                                                                                    ***                               
«Aıqyn» gazetiniń jazýynsha, London Olımpıadasynda altynan olja salǵan Serik Sápıev óz júldesin basqa-basqa emes, Reseıdiń Sberbankine saldy. Qazir Sberbanktiń Serik Sápıevtiń sýretin ilgen jarnamasy Qazaqstannyń talaı qalasynda ilinip tur. «Sonda qalaı? Sápıev Qazaqstannyń bankterine senbeı me? Halyqtyń kókeıinde osyndaı suraq kepteledi. Eger Serik óz júldesin Qazaqstannyń Halyq bankine salsa, bir jón. «E, durys bolǵan eken» dep el qýanyp qalar edi. Qaıdaǵy orys bankine qarjy salǵany qalaı dep keı aǵaıyn keıistik tanytady», - dep jazady basylym. Shaǵyn aqparat «Serkeler elge senbeı me?»  degen taqyryppen basylǵan.

 «Qyzyl juldyzdy áskerı bıletti kórgen adam «Keńes odaǵy kezinde Otan aldyndaǵy boryshyn ótegen bolar» degen oıda qalary sózsiz. Biraq bir top qujat ishinen qolǵa túsken áskerı bılet 2003 jyly berilgen eken. Kórip kózimiz sharasynan shyqty. Nege Otan aldyndaǵy boryshyn ótegen Qazaqstan azamattaryna ondaǵan jyldar ótse de qyzyl áskerı bılet berilip kelgen?» dep jazady «Aıqyn» gazeti «KSRO-nyń áskerı bıleti qoldanysta júr» degen taqyryptaǵy aqparatynda.  Táýelsiz Qazaqstan azamattarynyń óz tólqujaty, jeke kýáligi bar. keıbiri san márte almasty. Tek er-azamattardyń óz jerinde Otan aldyndaǵy boryshyn ótep, «SSSR» degen jazbasy bar áskerı bıletpen júrgeni qorǵanys salasyna syn emes pe?!