KSRO halyq ártisi Ydyrys Noǵaıbaevty eske alý keshi ótedi

1931 jyly Almaty oblysynyń Talǵar qalasynda ómirge kelge sahna sańlaǵy 1989 jyly 58 jasynda dúnıeden ótken edi. 1954 jyly Máskeýdiń A.V.Lýnacharskıı atyndaǵy Memlekettik teatr óneri ınstıtýty janyndaǵy qazaq stýdııasyn bitirgen óner sheberi sahnalyq debıýtin M.Gorkııdiń dramasy boıynsha qoıylǵan spektaklderde Teterev pen Egor Býlychev ("Toǵysharlar", "Egor Býlychev jáne basqalarynda") rólinen bastady. 1954 jyldan ómiriniń sońyna deıin qazaq drama teatrynda úzdiksiz qyzmet etken óner maıtalmany teatr sahnasynda M.Áýezovtiń "Eńlik-Kebegindegi" Esendi, "Abaıynda" Abaıdy, Ǵ.Músirepovtiń "Aqyn tragedııasyndaǵy" Mylqaýdy (Balýandy), "Qozy Kórpesh - Baıan sulýynda" Qarabaıdy, E.Rannettiń "Adasqan ulyndaǵy" Mart Týıskini, Q.Muhamedjanovtyń "Jat eldesinde" Qurbandy, Q.Bekhojınniń "Ulan asýyndaǵy" Abylaıdy, Á.Nurpeıisov pen Á.Mámbetovtiń "Qan men terindegi" Kálendi, Shekspırdiń "Asaýǵa tusaýynda" Otello, Petrýchchıo, Lope de Veganyń "Qyzǵanyshtan mahabbatynda" Teodoro, Ioselıanıdiń "Arbań aman bolsynynda"Agabony sheberlikpen somdady.

Ydyrys Noǵaıbaev kıno ónerinde de óz qoltańbasyn qaldyrdy. Onyń ishinde "Mazasyz kóktemde" (1955), "Botakózde" (1958), "Ómir jolynda" (1959), "Asýda" (1963), "Alǵashqy muǵalimde" (1964), "Shyńdaǵy shynarda" (1965), "Qıly kezeńde" (1966), "Qyz Jibektegi" (1970) rólderin erekshe atap ótýge bolady. Qazaq óneriniń damýyna qosqan eńbegi úshin 1966 jyly QazKSR halyq ártisi, 1974 jyly KSRO Memlekettik syılyǵynyń laýreaty atandy. 1970 jyldan bastap Almaty memlekettik óner ınstıtýtynyń akterler fakýlteti men respýblıkalyq estrada stýdııasynda ustazdyq qyzmetpen shuǵyldanǵan professor Y.Noǵaıbaev kóptegen óner sheberlerin daıyndap shyǵardy.