Kisiniń jeke bas deregi: AShM latıfýndısterdiń aty-jóni nelikten jarııalanbaıtynyn túsindirdi
Aýyl sharýashylyǵy mınıstriniń orynbasary Baǵlan Bekbaýov latıfýndısterdiń aty-jónin qandaı jaǵdaıda jarııalaı alatynyn aıtty, dep habarlaıdy Kazinform.
«Qazaqstandaǵy eń iri latıfýndıstiń ıeliginde neshe gektar jer bar? Kosmomonıtorıng nege halyq úmitin aqtamaı jatyr?» dep surady jýrnalıst Astana Hub ǵımaratynda ótken brıfıngide.
Mınıstrdiń orynbasary bul suraqqa janama jaýap berip, naqty málimet berýden jaltardy.
«Latıfýndıst dep kóp kólemde jer alyp, ony ıgerip nemese jalǵa berip otyrǵan tulǵalardy aıtýǵa bolatyn shyǵar. Bul jerde bireýdiń atyn atap, kinálamaı-aq qoıaıyq. Buǵan deıin bir tulǵaǵa 100 myń gektardan astam kólemde jer beriletin bolǵan. Qazirgi tańda ondaı iri kólemde jer alý protsesteri toqtatylǵan. Zańdy tulǵa 52 myń gektardan, jeke tulǵalar 35 myń gektardan artyq jer ala almaıdy. Sondaı norma bekitilgen. Kezinde úlken kólemde aýyl sharýashylyq maqsattaǵy jerdi basyp qalyp, elge bermeı jatyr degen másele kóterildi ǵoı. Sol problemalar qaıtalanbas úshin osy normany engizgenbiz. 5,4 mln gektar jer Úkimet menshigine qaıtarylǵanyn bilesiz. Sonyń ishinde latıfýndısterge jatqyzylǵan adamdardyń da jeri boldy», — dedi vıtse-mınıstr BAQ ókiliniń saýalyna bergen jaýabynda.
Onyń aıtýynsha, latıfýndısterden qoldanylmaı jatqan nemese durys qoldanylmaǵan jer telimderi ǵana qaıtarylady.
Al zańnyń qazirgi talaby buryn berilip ketken jer telimderine júrmeıdi.
«Kimniń atynda neshe gektar jer bar ekeni týraly arnaıy ashyq karta bar. Sol resýrstan jerdiń kadastry men ıesiniń bıznes sáıkestendirý nómiri arqyly kórýge bolady. Memleket menshigindegi jer telimderin jerkarta.gharysh.kz saıtyndaǵy ashyq derekte jarııaladyq. Sol arqyly qaı jerdiń kimnen qaıtarylǵanyn kórýge bolady. Negizi ol jerde kisiniń aty-jóni - jeke bas deregi sanalady ǵoı. Biraq memlekettiń menshigine qaıtarý kerek degen sottyń sheshimi jarııalanǵan jer telimderiniń burynǵy ıeleriniń bıznes sáıkestendirý nómiri men jeke sáıkestendirý nómirlerin kórsettik. Al ákimdikpen mámilege kelip, óz erkimen jerin qaıtarǵandardyń jeke derekterin kórsete almaımyz. Óıtkeni jerdi qaıtarǵan kezde qoıǵan talaptarynyń biri sondaı boldy. Buǵan deıin berilip ketken jerlerdiń jalǵa alý merzimi bar. Zańnyń qazirgi talabyn olarǵa qoldanaıyq desek te, bizde Konstıtýtsııa bar, zań bar, normalar bar. Olarǵa qaıshy kele almaımyz. Sondyqtan úlken mólsherde berilip ketken telimderdi ıgerip jatsa, zań boıynsha ári qaraı jumys isteýi kerek. Eger ıgerilmeı jatsa, qaıtarý máselesi kóteriledi», — dedi Baǵlan Bekbaýov.
