Pavlodarda «Jas daryn» mektebiniń oqýshylary jetim balalarǵa sabaq úıretip júr
PAVLODAR. KAZINFORM - «Jas Daryn» mektebiniń bir top oqýshysy jetim jáne qamqorlyqsyz qalǵan balalarǵa qosymsha sabaq úıretip, bilimde ilgeri basýyna kómektesip júr. Qamkóńil ul-qyzdardyń jandaryna jylýlyq syılaǵan joba 2021 jyldan turaqty jalǵasyp keledi.
Halqymyz «Jetim kórseń jebeı júr», dep beker aıtpaǵan. Taǵdyr talqysyna erte túsken jetim balalardyń kóńilin aýlap, janyna demeý berý, qamqorlyq kórsetý - ıgi is.
Osydan tórt jyl buryn Pavlodar qalasyndaǵy «Jas Daryn» mamandandyrylǵan mektep-lıtseıi «Oqýshydan-oqýshyǵa» degen bilim jobasyn bastap, ol búginde óńirdegi nátıjeli bastamanyń birine aınalyp úlgerdi. Qazirgi ýaqytta jas daryndyq 23 oqýshy «Kenjekól otbasylyq úlgidegi balalar aýylynda» tárbıelenip jatqan jetim jáne ata-ana qamqorlyǵynsyz qalǵan balalarǵa bos ýaqyttarynda qosymsha sabaq úıretedi. Onyń arqasynda balalar úıinde turatyn jasóspirimderdiń mekteptegi sabaǵy durystalyp, táýir baǵa ala bastaǵan. Tipti olardyń aldy oblys ortalyǵyndaǵy darynda balalarǵa arnalǵan mektepterge aýysyp, oqı bastaǵan.
- Otbasylyq úlgidegi aýylymyzda 70 balany tárbıelep otyrmyz. Olar kádimgi mektepterde bilim alady. Biraq bilimin qosymsha jetildirý úshin repetıtor jaldaýǵa bizde qarajat joq. Bizdi bul qıyndyqtan daryndy balalar qutqaryp otyr. Atap aıtqanda, 23 balamyz «Oqýshydan - oqýshyǵa» jobasynyń ıgiligin kórip otyr. Olar matematıka, aǵylshyn, Qazaqstan tarıhy, bıologııa sııaqty negizgi pánderden qosymsha sabaq alady, túsinbegen taqyryptaryn naqtylaıdy. Tıimdi ádistiń arqasynda bilimniń sapasy kóterilip kele jatyr. Tórt jyl ishinde bizdiń tárbıelenýshiler kóp nátıjege qol jetkizdi. Eń áýeli 14 balamyz búginde Pavlodardaǵy daryndy oqýshylarǵa arnalǵan mektepterde oqıdy. Bir túlegimiz Kaspıı ýnıvresıtetiniń bilim grantyn ıelendi. Bala men bala sóıleskende sabaqtyń jeńil qabyldanatynyn baıqaımyz. Tárbıelenýshilerimizge tegin qosymsha bilim usynyp otyrǵan lıtseı oqýshylaryna alǵysymyz sheksiz! - deıdi Kenjekól aýylyndaǵy balalar aýylynyń basshysy Aıjan Shamǵalıeva.
Negizi bul ıdeıanyń avtory – «Jas Daryn» mamandandyrylǵan mektep-lıtseıiniń dırektory Gúlnar Janǵazy. Alǵashqyda bul iske 7-8 oqýshyny jumyldyryp, tıimdilin baıqaǵan soń qosymsha bilim berýge yntaly ózge daryndy balalardy tarta bastaǵan.
- 2021 jyly mektebimiz ben balalar aýyly arasynda arnaıy memorandým qabyldadyq. Oqýshylarymyz úıretetin qosymsha bilim tegin ári onlaın túrde ótedi. Bizdiń mektepte daryndy balalar jetkilikti. Olardyń áleýetin jetim balalardy damytýǵa baǵyttasaq, odan utylmaıtynymyzdy bildim. Oqýshylar alǵashqyda mundaı balalar aýyly baryn bilmeıtin. Jetim balalardyń taǵdyrlary týraly aıtqanymyzda, oqýshylarymyzdyń boıynda janashyrlyq sezimi oıandy. Keıin mundaı jobanyń bar ekenin ata-analarǵa habardar ettik. Eresekter balalarynyń ıgi ispen aınalysyp júrgenin estigende kózderine jas alyp, qatty tolqydy. Keıin tipti olardyń qosymsha sabaqtardy turaqty ótkizýin qadaǵalaı bastady. Balalary sabaq ótkizer aldynda bólmelerin jıystyryp, ádemi kıimderin kıip, ózderin eresek adamdarsha ustaıtyndaryn aıtyp keledi ata-analary. Munyń barlyǵy bizdi qýantady, - deıdi mektep basshysy.
Qazirgi ýaqytta «Jas Daryn» boıynsha 8-11 synyptardaǵy oqýshylar bul ispen turaqty shuǵyldana bastaǵan. Aıtýlarynsha, balalar úıindegi tárbıelenýshiler kóbine qıyn taqyryptardy meńgerý úshin, bólim boıynsha jıyntyq baǵalaý kezinde jıi habarlasady eken. Sóıtip ekeýara ýaqytyn kelisip, sabaqty onlaın túrde ótkizedi.
- 11-synypta oqyp jatyrmyn. Sofııa esimdi 10-synyp oqýshysyna bos ýaqytymda bıologııadan qosymsha sabaq ótkizemin. Sofııa alda ótetin taqyryptar týraly, qandaı ýnıversıtetterge túsýge bolatynyn kóp suraıdy. Keıde ózim bilmeıtin tustarymdy osyndaı sabaqtar arqyly qaıtadan zerttep alamyn. Ata-anam meni únemi qoldaıdy. Olar bul isimniń eki jaqqa da paıdaly ekenin jaqsy túsinedi, - deıdi daryndy jas Aldııar Túmenbaev.
Al 11-synyptyń taǵy bir oqýshysy Nuraıym Janǵazy balalar aýylynda turatyn Artem Gerasımchýkke aǵylshyn tilinen kómektesip júr. Aıtýynsha, Artem aǵylshynsha tilin syndyryp, ájepteýir úırenip qalǵan. Mektepte úzdik baǵa alyp júrgenin aıtyp maqtanady.
- Ózge balalarmen tez til tabysa alamyn. Kenjekóldegi balalar úıinde birneshe márte bolyp, Artemmen kezdestim. Onyń úırenýge degen yntasy bar. Óte sypaıy, meıirimdi bala. Armany kóp, fýtbol oınaǵandy unatady, - deıdi Nuraıym.
Oqýshy qyz bos ýaqytynda mýzyka tyńdap, bı bılegendi unatady. Óz synyptastary arasynda balalar úıine qamqor bolyp júrgen qurby-qurdastary barshylyq ekenin jetkizdi.
Balalar aýylynyń tárbıelenýshisi Alvına Mıronova jas daryndyqtarǵa alǵysy sheksiz ekenin aıtady. Ol aǵylshyn tilinen sabaq úırenip, kúndeliginde bestikter paıda bola bastaǵan.
Al Andreı Golovanov ınformatıkadan, Artýr Shkrebets matematıkadan oqý úlgerimderi kóterilip qalǵanyn jetkizdi.
«Jas daryn» mektebiniń ustazdary men ata-analar qaýymy Kenjekól balalar aýyly tárbıelenýshileriniń tilekterine únemi nazar aýdaryp, Naýryz jáne Jańa jyl merekelerinde syılyqtar jasaıdy. Máselen, bıylǵy Jańa jylda 6 balanyń Aıaz ataǵa jazǵan haty «Jas darynnyń» jomart jandaryna tap bolypty.
Mereke qarsańynda jetkinshekter olardyń tarapynan mol syılyqqa kenelip, kóńili jarqyraı tústi.
Atap óterligi, 2024 jyly Qamqorshylar kúnine oraı «Jas darynnyń» belsendi oqýshylary saýapty isi úshin Pavlodar oblysy ákiminen Alǵys hat alǵan.
Eske sala keteıik, jetim jáne ata-ana qamqorlyǵynsyz qalǵan balalardy qorǵaý tetikteri kúsheıtildi.