Kishkentaı Lıýlıý jáne Sırııadan qutqarylǵan 506 bala — UQK «Jýsan» operatsııasy týraly
ASTANA. KAZINFORM — Sońǵy jyldary júrgizilgen eń aýqymdy gýmanıtarlyq operatsııalardyń biri «Jýsan» arqyly 735 qazaqstandyq, onyń ishinde 506 bala qutqarylǵan. Ulttyq qaýipsizdik organdary kúnine oraı, UQK baspasóz qyzmeti basshysynyń orynbasary Maıgúl Aınabekova «Jýsan» operatsııasynyń nátıjesi týraly aıtyp, Sırııa lagerinen kishkentaı Lıýlıý esimdi qyzdy qutqarý oqıǵasyn aıtyp berdi.
Onyń aıtýynsha, «Jýsan» operatsııasy 2019 jyldan 2021 jylǵa deıin birneshe kezeńmen júrgizilgen. Bul ýaqytta Sırııada terrorıstik «DAISh» (Qazaqstanda tyıym salynǵan uıym — red.) uıymy men úkimet áskeri arasynda halyqaralyq koalıtsııanyń qoldaýymen urys qımyldary jalǵasyp jatqan edi. Myńdaǵan áıelder men balalar qorǵansyz qlyp, lagerler men soǵys aımaqtarynda qalyp qoıdy.
− Ol lagerlerde qazaqstandyq áıelder men balalar da boldy. Olardy kómeksiz qaldyratyn quqyǵymyz bolmady. Meni eń tolqytqan sát 6 jasar Lıýlıýdiń oqıǵasy boldy. Onyń kózinde qorqynysh pen úmit qatar turdy. Ony lagerden ózim alyp shyqtym, alǵash ret óz esimin sybyrlap aıtqanyn estidim, − dedi Maıgúl Aınabekova.
Arab tilinen aýdarǵanda «Lıýlıý» esimi «marjan» maǵynasyn beredi. Búldirshin qyz birneshe jyl lagerde turǵan, tili arabsha shyǵyp, qazaqsha túsinbeıdi. Qazir onyń jańa esimi, jańa ómiri bar. Mektepke baryp, týystarymen sóılesip, qalypty ómirge alǵashqy qadamdaryn jasap júr.
Onyń málimetinshe, «Jýsan» operatsııasy aıasynda Qazaqstanǵa 735 azamat qaıtarylǵan, onyń 506-sy − balalar. 34 bala jetim qalsa, 55 adam terrorızmge qatysqany úshin qylmystyq jaýapkershilikke tartylǵan. Qalǵandary ońaltý jáne áleýmettendirý baǵdarlamalarynan ótken.
− Eń bastysy — balalar. Biz olarǵa tek pasport pen qujattaryn ǵana qaıtarmaımyz, biz olarǵa qorqynyshsyz ómir súrý, oqý jáne armandaý quqyǵyn qaıtaramyz, − dedi Maıgúl Aınabekova.
Operatsııanyń barlyq kezeńine QR UQK, Syrtqy ister mınıstrligi, dárigerler, psıhologtar jáne teologtar qatysqan. Qazaqstannyń bul tájirıbesin basqa elder de zertteı bastady. Ońaltýdan ótken 76 áıel radıkaldy kózqarastarynan bas tartyp, qazir halyqaralyq forýmdarda radıkaldy ıdeologııaǵa qarsy turýdyń mańyzdylyǵyn jáne balalardy elge qaıtarýdyń qajettiligin aıtyp keledi.
Maıgúl Aınabekovanyń aıtýynsha, qazirgi ýaqytta «Jýsan» operatsııasynyń jańa aýqymdy kezeńderi josparlanbaǵan, alaıda azamattardy qaıtarý jáne qorǵaý jumystary jalǵasyp jatyr.
Bıylǵy mamyr aıynda BUU Qylmystyń aldyn alý jáne qylmystyq sot tóreligi jónindegi komıssııasynyń 34-sessııasynda «Jýsan» operatsııasyna joǵary baǵa berildi. Qaqtyǵys aımaqtarynan qaıtarylǵan bosqyndardy qaıta qoǵamǵa beıimdeý salasyndaǵy Qazaqstannyń ozyq tájirıbesi BUU, EQYU jáne Aýstrııa SІM ókilderiniń nazaryn aýdardy.
— Meniń oıymsha, Qazaqstannyń repatrıatsııa jáne reıntegratsııa boıynsha júrgizgen operatsııalary oń nátıjege qol jetkizdi. Sizderdiń elińiz bul baǵytta aımaqtaǵy kóshbasshy sanalady. Rımma Júnisovanyń jeke tarıhyn tyńdaý óte qyzyqty boldy, bul oqıǵa mundaı sharalardyń Ortalyq Azııadaǵy basqa memleketter úshin qanshalyqty mańyzdy ekenin kórsetti. Osy is-sharany uıymdastyrǵany úshin Qazaqstan tarapyna alǵys aıtamyn jáne bolashaqta yntymaqtastyqqa daıynbyz, − degen bolatyn BUU-nyń Esirtki jáne qylmys jónindegi basqarmasynyń Terrorızmniń aldyn alý sektory bóliminiń basshysy Keıt Fıttspatrık.
Aıta keteıik, Ulttyq qaýipsizdik organdary kúni qarsańynda UQK tóraǵasy Ermek Saǵymbaev Kazinform agenttigine eksklıýzıvti suhbat berip, elimizdiń aldynda turǵan basty syn-qaterlerdi atady. Onyń ishinde terrorızm, dinı ekstremızm, transulttyq qylmys, kıbershabýyldar men syrtqy yqpal etý áreketteri de bar.