Kishkentaı qyzdy zorlady degen kúdikpen Almaty oblysynda er adam ustaldy
Almaty oblysynda kishkentaı qyzdy zorlady degen kúdikpen 40 jastaǵy er adam ustaldy, dep habarlaıdy QazAqparat tilshisi.
Áleýmettik jelide taraǵan aqparatta anasymen birge turatyn er adam 3 jasar qyzdy zorlaǵany aıtyldy.
Almaty oblystyq Polıtsııa departamentiniń málimetinshe, 3 qazan kúni Balqash aýdanynyń jergilikti turǵyn polıtsııa bólimine júginip, kishkentaı qyzyna aýyldasy seksýaldyq sıpattaǵy áreketter jasaǵany týraly aıtqan.
Qylmysty ashý jáne qylmyskerdi ustaý úshin dereý oblystyq jáne aýdandyq polıtsııa qyzmetkerlerinen arnaıy jedel-tergeý toby qurylǵan. Jedel qyzmetkerler qylmys jasady degen kúdikpen 40 jastaǵy er adamdy anyqtap, ustady.
«QR Qylmystyq kodeksiniń 120-babynyń 4-bóligi jáne 121-babynyń 4-bóligi boıynsha sotqa deıingi tergeý bastaldy (jas balany zorlaý jáne seksýaldyq sıpattaǵy zorlyq-zombylyq áreketter). Qazirgi ýaqytta saraptama taldaýlaryn belgileýmen qatar, barlyq qajetti tergeý áreketteri júrgizilip jatyr, bul qylmystyq faktini sheshýde onyń tolyqtyǵyn, jan-jaqtylyǵyn jáne obektıvtiligin qamtamasyz etedi. Іsti tergeý meniń erekshe baqylaýymda», – dedi Almaty oblystyq Polıtsııa departamentiniń basshysy Baýyrjan Álenov.
