Kishkentaı alandar búginde eseıgen: Katonqaraǵaıda ilbis qaıta fototuzaqqa tústi
ASTANA. KAZINFORM — Katonqaraǵaı memlekettik ulttyq tabıǵı parkiniń aýmaǵynda úsh kúshigimen (alanymen) júrgen ilbis fototuzaqqa qaıta tirkeldi, dep habarlaıdy Orman sharýashylyǵy jáne janýarlar dúnıesi komıtetiniń baspasóz qyzmeti.
Ulttyq park ormanshysy Jomart Amanbaev ilbistiń tirshiligin zertteý maqsatynda bıik taý jotalaryna ornatqan fototuzaq erekshe kadrlardy túsirip alǵan.
Birneshe aı buryn dál osy aýmaqta úsh kishkentaı kúshigimen birge obektıvke ilikken ilbis bul joly da urpaqtarymen birge baıqaldy. Qys mezgilinde túsirilgen kadrlardaǵy kúshikterdiń qazir aıtarlyqtaı ósip, anasymen birge taýly óńirde erkin qozǵalyp júrgeni kórinedi.
Mamandardyń aıtýynsha, jabaıy tabıǵatta mundaı kórinisterdiń tirkelýi — óte mańyzdy ǵylymı derek. Bul sırek kezdesetin jyrtqyshtyń tabıǵı mekeninde qaýipsiz ósip, kóbeıip jatqanyn jáne ekojúıeniń turaqtylyǵyn aıǵaqtaıdy.
Ulttyq park qyzmetkerleri mundaı baqylaýlar ilbistiń popýlıatsııasyn zertteýge jáne ony qorǵaý sharalaryn jetildirýge múmkindik beretinin atap ótti.
Buǵan deıin mamandar ilbistiń tabıǵı mekendegi tirshiligin spýtnık arqyly zerttep jatqanyn jazǵanbyz.
