Kishkene balaǵa elemeý ádisin múlde qoldanýǵa bolmaıdy — psıholog

ASTANA. KAZINFORM — Psıholog Aınur Aldash qazirgi qoǵamda trend bolyp jatqan balanyń keıbir qylyǵyn elemeý ádisin qandaı jaǵdaıda qoldaný keregin túsindirdi.

— Áleýmettik psıhologııa, qarym-qatynas psıhologııasy bar. Sonyń ishinde konflıktologııa degen bólim bar. Sol jerde bireý seni konflıktige tartatyn bolsa, oǵan jaýap qatpaý, elemeý tıimdirek bolady delinedi. Áleýmettik jelide de bireý sizge heıt jazatyn bolsa, oǵan reaktsııa bermeı, elemeı qoıý tıimdirek bolyp sanalady. Sol sııaqty qazir balanyń tárbıesinde onyń keıbir manıpýlıatsııa jasaý, jylap kóndirý sekildi oǵash qylyqtary men orynsyz áreketterin elemeı qoıa salý durys tásil delinedi. Qazir osyndaı bir trend paıda boldy. Óz basym bul ádisti qatty qoldaı qoımaımyn, biraq onyń jumys isteıtin kezderi bolady, — dedi ol Jibek Joly telearnasyndaǵy «Bugin Live» baǵdarlamasynda.

Mamannyń aıtýynsha, bul ádisti kishkentaı balaǵa qoldaný durys emes. 

— Kishkentaı balaǵa, ásirese 2-3 jastaǵy balalarǵa elemeý ádisin múlde qoldanýǵa bolmaıdy. Óıtkeni bala endi ómirge aıaq basyp jatyr, maǵan kez kelgen jaǵdaıda áke-sheshem kómektesedi degen senim bolýy kerek. Sondyqtan 3 jasqa deıin bul ádisti múlde qoldanbaǵan jón. Keıin óse kele bala jylap kóndirýge, manıpýlıatsııa jasaýǵa beıim bola bastaıdy. Suraǵanyn alyp bermeseń jer tepkilep jylaý degen sekildi jaǵdaılar bolady. Osyndaı jaǵdaıda balanyń aıtqanyna kóne beretin bolsaq, ol qylyǵy órship ketedi. Mine, osy kezde jańaǵy ádisti qoldaný kerek, biraq ornymen, mólsherimen, — dedi psıholog.

Aıta keteıik, Qazaqstanda balalar qaýipsizdigi kúsheıtilip, jańa tárbıe baǵdarlamalary engizilip jatyr.