Q.Sharlapaev ózin Úkimet músheleriniń ishindegi aýtsaıder retinde ataǵan sarapshynyń synyna jaýap berdi

ASTANA. KAZINFORM – Ónerkásip jáne qurylys mınıstri Qanat Sharlapaev Úkimet otyrysynan keıin ótken baspasóz máslıhatynda ózin mınıstrler arasyndaǵy aýtsaıderler qatarynda ataǵan saıasattanýshynyń synyna jaýap berdi. 

«Saıasattanýshy Danııar Áshimbaev Úkimet músheleriniń jumysyna baǵa bere otyryp, A.Shaqqalıev, A.Saparov sııaqty áriptesterińizben birge sizdi de mınıstrler arasyndaǵy aýtsaıder retinde atady. Ýtılalym daýynan keıin qoǵam ishinde de sizdi otstavkaǵa ketsin deýshiler kóp. Osyǵan ne aıtasyz?» - dep surady jýrnalıst.

Bul suraqqa mınıstr jaýap berdi.

«Men qandaı da bir saıasattanýshynyń paıymyna pikir bildire almaımyn. Onyń qarapaıym ǵana sebebi bar. Olar bul jerde men jaıynda ǵana emes, ózge de áriptesterim týraly pikir bildirgen. Osyǵan baılanysty men pikir bildirýden tartynyp qalamyn. 

Ýtılalym boıynsha aıtsaq, taǵy da aıtamyn, bul máselege baılanysty endi eshqandaı pikir bildirmeımiz. Buǵan deıin resmı málimdeme jarııalaǵanbyz. Sondyqtan ol máselege qaıta oralmaımyz», - dedi Qanat Sharlapaev.