Kishi Taldykól mańynda ekopark qurylysy qashan bastalady
ASTANA. KAZINFORM – Astanada Kishi Taldykól tóńiregindegi daý boıynsha sot sheshimi shyǵyp, birqatar kóldi saqtaý jáne jaǵalaýda ınfraqurylym salý mindeti bekitildi. Bul týraly Astana ákimi Jeńis Qasymbek Jibek joly telearnasynyń «Ýáde» baǵdarlamasynda málim etti.
Qala ákiminiń aıtýynsha, qazirgi tańda sot sheshimine sáıkes birneshe kóldi saqtaý jáne olardyń mańyn abattandyrý jumystary júrgiziledi.
– Kishi Taldykól tóńiregindegi daý úsh jyl burynǵydaı emes, qazir ondaı másele joq. Sot sheshimi shyqty, birneshe kóldi saqtaý mindetteldi jáne kólderdiń janynan ınfraqurylym salýǵa mindettimiz. Kelesi aptada 5-shi jáne 7-shi kóldiń mańynda ekopark qurylysyn bastaımyz. Qurylystyń 70 paıyzy bıyl, qalǵan 30 paıyzy kelesi jyly júrgiziledi. Jalpy jobany kelesi jyldyń kúzine deıin aıaqtaýdy josparlap otyrmyz, – dedi ákim.
Sonymen qatar Jeńis Qasymbek Úlken Taldykóldegi sý kóleminiń artyp kele jatqanyn atap ótti.
– Úlken Taldykólde sý kólemi jyl saıyn kóbeıip jatyr. 2023 jyly shamamen 3 mln tekshe metr bolsa, byltyr 5 mln tekshe metrden asty, – dedi ol.
Ákim elordanyń ekologııalyq ahýaly men gazdandyrý jumystaryna da toqtaldy.
– Ekologııaǵa qatysty gaz máselesi bar. Bizdiń jospar boıynsha bıyl turǵyn aýdandar tolyq gazben qamtylady. JEO-1 men JEO-2 gazǵa kóshirildi, al JEO-3 tek gazben jumys isteıdi. Jańa stantsııalar da tek gaz negizinde iske qosylady. Qazir qala tolyq gazben qamtylyp otyr. Bolashaqta qalaǵa jylyna 1 mlrd tekshe metr gaz qajet bolady, mınıstrlik jospar boıynsha osy kólemde gaz berýdi qarastyryp otyr, – dedi Jeńis Qasymbek.
Aıta keteıik, kishi Taldykól ornynda salynatyn ekopark qurylysyna 4,5 mlrd teńge jumsalmaq.
