Kishi Aralǵa 51 mlrd tekshe metr sý jınaý múmkin emes — eks-mınıstr

ASTANA. KAZINFORM — Burynǵy Melıoratsııa jáne sý sharýashylyǵy mınıstri Narıman Qypshaqbaev Kókaral bógetin 2 metrge kóterýdi usynyp otyr. Sý sharýashylyǵy salasynyń ardageri Soltústik Aral teńizin saqtaýdyń óz nusqasyn tanystyrdy. Onyń aıtýynsha, Kishi Aralǵa 30 mlrd tekshe metrden artyq sý jınalmaıdy.

— Kishi Aralǵa 51 mlrd tekshe metr sý jınaý múmkin emes. Sý mol kelgenniń ózinde 30 mlrd-tan artyq jınaı almaımyz. Sebebi, Syrdarııanyń jalpy sý kólemi 37 mlrd tekshe metr. Búgingi tańda ózen boıyndaǵy 4 memlekettiń sýǵa degen suranysy 3 ese artyp ketti. 100 mlrd sý surap otyr. Halyq sany kóbeıip jatyr, jańadan zaýyt-fabrıkalar salynyp jatyr, eldi mekender boı kóterip jatyr. Odan artyq sý keledi degen bos áńgime, — dedi burynǵy sý sharýashylyǵy mınıstri Narıman Qypshaqbaev.

Sý salasynyń ardageri Syrdarııa ózeniniń sý kólemi turaqty emes ekenin de aıtady. Tipti 4-5 jyl qatarynan sýy az jyldar tsıkli qaıtalanyp otyrǵan.

— Men «Kishi Aral» jobasyn 1988 jyly bastaǵanmyn. 2006 jylǵa deıin Aral teńizinen bir de bir shabaq aýlanǵan joq. Balyqshylardyń bári jan-jaqqa kóship ketti. Biz 12 shaqyrym bógetti salǵaly teńizdiń sý tuşylanyp, qazir jylyna 8-10 tonna balyq aýlaıtyn boldy. Aral qalasynda 8 balyq zaýyty salyndy. Bóget óziniń kerek ekenin dáleldedi. Endi tek sol bógetti 2 metrge kóterip, beriktigin nyǵaıtý kerek, — dedi Qazaqstannyń Eńbek sińirgen gıdrotehnıgi.

Sý resýrstary jáne ırrıgatsııa mınıstrliginiń málimetinshe, búgingi tańda mınıstrlik Soltústik Aral teńizin saqtaý jobasynyń birneshe nusqasyn pysyqtap jatyr. Osyǵan qatysty Aral aýdanynyń turǵyndarymen qoǵamdyq talqylaýlar ótti. Jobany iske asyrý Soltústik Araldyń saqtalýyna, sýdyń tuzdylyǵynyń tómendeýine jáne teńiz basseınindegi ekologııalyq jaǵdaıdyń jaqsarýyna yqpal etedi.

Aıta ketelik elimizde sırek jer resýrstarymen jumys isteıtin geologterdi daıarlaýǵa basymdyq beriledi.