Kishi Araldyń qalpyna kelýi jańa múmkindikterge jol ashady – depýtat

QYZYLORDA. KAZINFORM - Ulttyq quryltaıda Memleket basshysy Syr jurtshylyǵynyń eńbekqorlyǵy men uıymshyldyǵyn, týǵan jerge súıispenshiligi men janashyrlyǵyn joǵary baǵalady. Parlament Májilisiniń depýtaty Marhabat Jaıymbetov qoǵamdyq iske óńir turǵyndarynyń belsendi aralasýyn erekshe atap ótti.

- Oblys ortalyǵymen qatar aýyl-aımaqtyń tazalyǵy, kórkeıýi de nazardan tys qalmady. Naǵı Іlııasov pen Tań aýyldaryn búkil elge úlgi etýi - jergilikti halyqtyń tártipke, birlikke jáne ortaq jaýapkershilikke oń kózqarasynyń nátıjesi, - dedi depýtat. 

Prezıdent elimiz úshin strategııalyq resýrs sanalatyn sý máselesimen júıeli túrde aınalysý kerektigin atap ótti. 

- Bul baǵytta júıeli ári uzaq merzimdi sheshimder qabyldaýdyń mańyzy erekshe. Osy oraıda Birikken Ulttar Uıymy aıasynda halyqaralyq sý uıymyn qurý jaıy sóz boldy. Sáýir aıynda Astanada ótetin Halyqaralyq ekologııa sammıtinde Araldy qutqarý qoryna múshe memleketter basshylarymen birge Aral máselesi talqylanbaq, - dedi Marhabat Jaıymbetov. 

Ol Kishi Araldyń qalpyna kelýi Syr óńiriniń ekologııalyq jáne áleýmettik-ekonomıkalyq damýyna jańa múmkindikter ashatynyna senimdi. 

- El taǵdyry - ortaq jaýapkershilik. Osyndaı tarıhı kezeńde ár azamattyń birligi men yntymaǵy, eńbegi men janashyrlyǵy eldi alǵa bastyrady. Bir maqsatqa jumylǵan jurt qana berekeli bolashaqty birge qalyptastyra alady, - dedi depýtat. 

Sý resýrstary jáne ırrıgatsııa mınıstri Nurjan Nurjigitov buǵan deıin Soltústik Aral teńizin saqtaý jobasynyń ekinshi kezeńi ázirlenip jatqanyn málimdedi.