Kishi Aralda zańsyz balyq aýlaǵandarǵa qatysty qylmystyq is qozǵaldy

QYZYLORDA. KAZINFORM – Qyzylordada ótip jatqan «Ýyldyryq-2025» jedel profılaktıkalyq is-sharasynyń alǵashqy 14 kúninde 3 qylmys anyqtaldy.

Aral-Syrdarııa oblysaralyq basseındik balyq sharýashylyǵy ınspektsııasynyń mamandary polıtseılermen birge 14 sáýir kúni Aral aýdany Shómishkól eldi mekeniniń eki turǵynyn Kishi Aral teńiziniń «Kókaral» bógeti aýmaǵynda zańsyz balyq aýlap júrgen jerinen ustady.

Tekserý barysynda «Merkýrıı-15» úlgisindegi «Progress» motorly qaıyq, aý quraly, salmaǵy 275 keliden asatyn birneshe túrli balyq aıǵaq zat retinde alyndy. Atalǵan derek boıynsha Qylmystyq kodekstiń 335-baby 3-bóliginiń 4-tarmaǵymen qylmystyq is tirkelip, sotqa deıingi tergeý amaldary júrgizilýde.

Oblystyq polıtsııa departamentiniń málimetinshe, balyq aýlaý, balyq resýrstary men basqa da sý janýarlaryn qorǵaý qaǵıdalaryn buzý boıynsha 57 ákimshilik quqyq buzý deregi tirkeldi. 

«Syrdarııa ózeninde 1 sáýir-31 mamyr aralyǵynda, barlyq sý aıdynynda 20 sáýir-10 maýsym aralyǵynda, sondaı-aq Kishi Aral teńizinde 1 mamyr-10 maýsym aralyǵynda Qyzylorda oblysynyń aýmaǵynda kóktemgi balyq resýrstary men basqa da sý janýarlarynyń ýyldyryq shashý jáne kóbeıý kezeńi ótedi. Osy ýaqytta balyq aýlaýǵa tyıym salynady», - delingen vedomstvo habarlamasynda. 

Aktsııa aıasynda reıdtik is-sharalar, sý aıdyndarynyń monıtorıngi jáne tabıǵat qorǵaý zańnamasynyń saqtalýyn tekserý josparlanǵan.

Aıta keteıik, Qyzylordada jyl basynan beri 118 ınternet alaıaqtyq deregi tirkeldi.