Kseroks kompanııasy ıntellektýaldyq menshik nysandary qorjynyn 1031 AQSh patentimen tolyqtyrdy
ALMATY. 8 aqpan. QazAqparat /Erlik Erjanuly/ - Kseroks kompanııasyndaǵy ıntellektýaldyq menshik nysandary qorjyndaǵy AQSh patentteri byltyr aldyńǵy jylmen salystyrǵanda 1031 nemese 46 paıyzǵa ósken.
Búgin Almatyda kompanııanyń baspasóz qyzmeti taratqan habarlamaǵa qaraǵanda Kseroks 2010 jyly AQSh patentin ustaıtyn úzdik 20 kompanııanyń qataryna endi.
Kserokstiń tehnologııa jónindegi bas dırektory, Xerox Innovation Group prezıdenti Sofı Vanderbroktyń aıtýynsha, kompanııanyń 2400-den astam qyzmetkerinde 5 jáne odan da kóp patent bar. Olardyń kóbi munda qazirgi tańda da óz qyzmetin odan ári jalǵastyryp júr. Intellektýaldyq menshik qorjynynyń jyl ótken saıyn ulǵaıýyna ınnovatsııalyq tehnologııalarǵa salynatyn ınvestıtsııa óz yqpalyn tıgizýde. Máselen, patentter sany onda 2006 jylmen salystyrǵanda jyl saıyn 86 paıyzǵa deıin ósken.
