Ksenııa Sobchak AEF-te saıasattaǵy áıelderdiń róli týraly aıtpaq
«Reseıde ótken Prezıdent saılaýyna jáne ondaǵy jańa Úkimettiń qurylýyna baılanysty reseılik delegatsııany bastap keletini josparlanǵan Igor Shývalov forýmǵa kelmeıtin boldy. Onyń ornyna forýmǵa RF Úkimeti tóraǵasynyń orynbasary Dmıtrıı Kozak qatysady», - dedi «GVA Kazakhstan» seriktesi jáne AEF-tiń bas prodıýsseri Bolat Stolıarov.
Sonymen qatar, ol forýmǵa Ksenııa Sobchaktyń keletinin rastady.
«Óziniń tyǵyz kestesine qaramastan, Ksenııa Anatolevna rasynda da, forýmǵa qatysatyn bolady. Biz keshe onymen forýmǵa qatysý modeli turǵysynan qorytyndy kelissózderdi júrgizdik. Ol BUU-nyń Áıelder uıymynyń jumysy men álemdik ekonomıka men saıasattaǵy áıelderdiń róline baılanysty AEF-ke 18 mamyr kúni qatysady. Ksenııa Sobchak - osy baǵdarlama boıynsha spıkerlerdiń biri», - dedi ol.
Meımandardyń negizgi shoǵyry forýmǵa 16 mamyry kelip jetpek. Jumys kestesi tyǵyz spıkerlerdiń bir bóligi 17 mamyr kúni tańerteń jetedi.
Sonymen qatar, shara barysynda QR Ulttyq ekonomıka birinshi vıtse-mınıstir Rýslan Dálenov XI Astana ekonomıkalyq forýmyn ótkizýge ótken jyldyń deńgeıindeı, tipti odan da az aqsha jumsalatynyn tilge tıek etti.
Aıta ketsek, búgin elordadaǵy elordadaǵy eńseli qonaqúılerdiń biri - «Hılton Astanada» XI Astana ekonomıkalyq forýmynyń saltanatty túrde akredıtatsııalyq ortalyǵy ashyldy. Akredıtatsııany sondaı-aq, Nursultan Nazarbaev áýejaıynan, «Marrıot», «Rıksos» otelderinen jáne «Kerýen» oıyn-saýda ortalyǵynan alýǵa bolady.
Eske sala ketsek, XI Astana ekonomıkalyq forýmy elordada 17-19 mamyr kúnderi ótedi. QR Ulttyq ekonomıka mınıstri Tımýr Súleımenovtyń aıtýynsha, XI Astana ekonomıkalyq forýmynyń negizgi ereksheligi - AEF úsh kúnge sozylady. Alǵashqy eki kún boıy qatysýshylar jahandyq máselelerdi talqylaıdy. Al, úshinshi kúni negizgi spıkerler qalyp, kúni boıy alty baǵyt boıynsha Qazaqstan úkimetimen, sondaı-aq sarapshylarmen birge jumys isteıtin bolady.
«Negizgi maqsat - forým kezindegi barlyq ıdeıalardy jazyp alý, bizge laıyqty usynystardy iske asyrý. Biz sonyń bárin qaǵazǵa túsirip, óz elimizde iske asyrýǵa tyrysamyz. Bizge naqty usynystar qajet», - deıdi T.Súleımenov.
Sonymen birge, buǵan deıin AEF-ke qatysatyn spıkerler sany rekordtyq kórsetkishke jetetini habarlanǵan bolatyn.
