Kisi óltirdi degen kúdikpen 17 jyl izdeýde júrgen qazaqstandyq Lıtvadan elge jetkizildi
ASTANA. KAZINFORM — Búgin Bas prokýratýra men Іshki ister mınıstrliginiń qyzmetkerleri Syrtqy ister mınıstrliginiń qoldaýymen Lıtvadan 17 jyl boıy kisi óltirý jáne atys qarýyn zańsyz saqtaý faktileri boıynsha izdeýde bolǵan Qazaqstan azamatyn ekstradıtsııalady, dep habarlaıdy Bas prokýratýranyń baspasóz qyzmeti.
Vedomstvo málim etkendeı, 2007 jyly kúdikti sybaılasymen birge zańsyz jolmen baıý maqsatynda Almaty qalasyna kelgen. Olardyń qylmystyq áreketi ózge qylmystyq top ókilderimen janjalǵa ákelip, sonyń saldarynan olardyń birin óltirýge sheshim qabyldaǵan. 2008 jylǵy 19 mamyrda kúdiktiler ózderiniń qylmystyq nıetterin júzege asyryp, jábirlenýshini óz úıiniń aýlasynda tosyp alyp, oǵan birneshe ret oq atqan. Sońǵy oq basynan tıgen, ıaǵnı «baqylaý» oq bolǵan. Alynǵan jaraqattardan jábirlenýshi oqıǵa ornynda qaza tapqan. Qylmys jasaǵannan keıin kúdiktilerdiń biri ustalyp, keıin sot úkimimen sottaldy, al ekinshisi jasyrynyp, oǵan halyqaralyq izdeý jarııalandy.
— Jazadan jaltarý maqsatynda kúdikti anketalyq derekterin ózgertip, Eýropa aýmaǵynda jasyrynǵan. 2025 jylǵy tamyz aıynda Lıtva Respýblıkasynyń shekarasyn kesip ótý kezinde ustaldy. Keıinnen Bas prokýratýranyń suraýy boıynsha ol Qazaqstanǵa ekstradıtsııalandy. Qazirgi ýaqytta kúdikti tergeý ızolıatoryna qamaýǵa alyndy. Aıyptalyp otyrǵan qylmystar úshin Qazaqstan Respýblıkasynyń zańnamasyna sáıkes on jyldan jıyrma jylǵa deıingi merzimge nemese ómir boıyna bas bostandyǵynan aıyrý, múlikti tárkileý túrindegi jaza kózdelgen, — delingen prokýratýra taratqan aqparatta.
Budan buryn júk kólikterin zańsyz tirkeýmen aınalysqan toptyń sybaılasy Reseıden ekstradıtsııalanǵanyn jazǵan edik.