Kisi ólimi kóbeıgen Túrkistan-Kentaý tasjoly 4 jolaqqa deıin keńeıtile me
TÚRKІSTAN. KAZINFORM — Halqy 100 myńnan asatyn Kentaý qalasy Túrkistannan nebári 30 shaqyrym jerde ornalasqan. Búginde kentaýlyqtardyń basym bóligi kún saıyn Túrkistanǵa qatynap jumys isteıdi, oblys ortalyǵyndaǵy joǵary oqý oryndarynda bilim alatyn jastar da az emes.
Qos qala arasyndaǵy barys-kelis jyl ótken saıyn artyp, sonyń saldarynan joldaǵy kólik aǵyny kóbeıip, tar jolǵa syımaıtyn jaǵdaılar jıilegen. Ásirese sońǵy ýaqytta jol-kólik oqıǵalarynyń jıileýi turǵyndar alańdaýshylyǵyn kúsheıtti. Kentaýlyqtar eń aldymen Túrkistanǵa barar joldy keńeıtip berýdi surap keledi.
Máselen, bıyl aqpan aıynda Túrkistan-Kentaý tasjoly boıynda iri jol apaty boldy. Kentaý qalasyna kireberis aýmaqta jeńil kóliktiń biri qarsy jolaqqa shyǵyp ketip, ekinshisimen soǵysqan.
Apat saldarynan kólik órtenip, 6 adam kóz jumdy. Al, 4 adam túrli dene jaraqatymen Kentaý qalalyq ortalyq aýrýhanasyna jetkizildi.
Túrkistan oblysy polıtsııa departamentiń resmı málimetine súıensek, 2023 jyly Túrkistan-Kentaý tasjolynyń boıynda 10 jol-kólik oqıǵasy bolyp, 16 adam jaraqattanǵan.
Ótken jyly osy jolda 6 jol apaty bolyp, bir adam qaza taýyp, 8-i zardap shekti.
Al, 2025 jyldyń basynan bergi 10 aıda 5 jol-kólik oqıǵasy tirkelgen, saldarynan 11 adam qaza tapty.
Departament tarapynan jol qaýipsizdigi boıynsha tıisti is-sharalar qabyldanǵan. ıAǵnı jol belgileri, jol jolaqtary jáne jyldamdyqty shekteýge arnalǵan beınekameralar ornatylǵan.
— Taldaý nátıjesinde Túrkistan-Kentaý tasjolynyń boıynda bolyp jatqan jol-kólik oqıǵalarynyń basty sebebi — júrgizýshilerdiń jol erejesin saqtamaýy (jyldamdyqty asyrý, manevrleý qaǵıdalaryn buzý, qarsy baǵytqa shyǵyp basyp ozý) ekenin túsindik. Іshki ister organdary tarapynan jol apatynyń aldyn alý maqsatynda atalǵan tasjolda 4 dana statsıonarly avtomattandyrylǵan beınebaqylaý kamerasy iske qosylyp, quqyq buzý faktilerin dronmen anyqtaý jumysy turaqty túrde uıymdastyrylyp jatyr, — dedi oblystyq polıtsııa departamentiniń ókilderi.
Túıtkildi másele boıynsha Májilis depýtaty Ulasbek Sádibekovpen pikirlesken edik. Onyń aıtýynsha, óńir turǵyndary úshin asa ózekti sanalatyn Túrkistan-Kentaý baǵytyndaǵy avtomobıl jolynyń tarlyǵy kún ótken saıyn ózekti bola túsken.
Osyǵan baılanysty depýtat jyl basynda Úkimetke arnaıy depýtattyq saýal joldaǵan.
— Eki shahardyń arasy jarty saǵattyq jol ǵana bolǵandyqtan Túrkistanǵa syrttan kelýshiler de baspana qolaıly bolǵandyqtan kóbine Kentaýdan páter jaldap turýdy jón kóredi. Taý bókterindegi taza aýa, jaıly klımat, tynysh orta — Kentaýdy ómir súrýge qolaıly qalaǵa aınaldyryp otyr. Bul baǵyt tek eki qalany ǵana emes, Sozaq aýdany arqyly Jambyl oblysyna shyǵatyn tranzıttik dáliz retinde de mańyzdy. Osy máseleni kótergen depýtattyq saýalǵa resmı jaýap usynyldy. Ondaǵy málimetke súıener bolsaq, Túrkistan-Kentaý avtomobıl jolyn qazirgi 2 jolaqtan 4 jolaqqa deıin keńeıtý úshin aldymen jol qozǵalysynyń qarqynyna taldaý júrgizý qajet. Jol júktemesin esepteý, ekonomıkalyq tıimdilikti aıqyndaý jáne tehnıkalyq-ekonomıkalyq negizdeme ázirleý jumystary qorytyndylanǵannan keıin ǵana jobany iske asyrýdyń naqty tetigi, merzimi jáne qarjylandyrý kólemi anyqtalady. Túrkistan-Kentaý baǵytyndaǵy joldyń keńeıýi — tek yńǵaıly ǵana emes, qaýipsizdik, ekonomıkalyq tıimdilik jáne óńirdiń tranzıttik áleýetin kúsheıtetin mańyzdy qadam. Bul baǵyttaǵy jumystyń júıeli túrde jalǵasýyna depýtattyq baqylaý ornatylyp, máseleniń tolyq sheshilýi nazarda ustalady, — dedi ol.
Májilis depýtatynyń sózinshe, Túrkistan-Kentaý baǵytynda sońǵy kezderi tirkelgen jol-kólik oqıǵalarynyń ósýine tek joldyń tarlyǵy ǵana emes, qaraýsyz júrgen mal men úı janýarlarynyń qozǵalysqa kedergi keltirýi de sebep bolyp otyr.
Túrkistan oblysy jolaýshylar kóligi jáne avtomobıl joldary basqarmasy bergen málimetke súıensek, atalǵan joldy aldaǵy jyldarda keńeıtý jospary qarastyrylmaǵan.
— Basqarmanyń tapsyrysymen 2020-2021 jyldary Túrkistan-Kentaý baǵytyndaǵy oblystyq mańyzy bar KH-190 avtomobıl jolynyń 7-26 shaqyrym aralyǵyna ortasha jóndeý jumystary júrgizilip, joldyń eni 7 metrden 9 metrge keńeıtildi. Joldaǵy sý ótkizý qubyrlary tolyq aýystyrylyp, eldimeken ishinde jaryqtandyrý, aıaqjol jáne aıaldamalar qarastyrylyp jasaldy. Joldyń búgingi jaǵdaıy qanaǵattanarlyq jaǵdaıda. Odan bólek Túrkistannan Kentaýǵa baratyn balama jol — Kentaý aınalma joly qarastyrylǵan. Búgingi kúni atalǵan jolmen táýligine 4-5 myń avtokólik qatynaıdy. Atalǵan joldy aldaǵy 3 jyl ishinde keńeıtý qarastyrylmaǵan, — delingen basqarmanyń bizge usynǵan jaýabynda.
Túrkistan men Kentaý arasyndaǵy joldy keńeıtý máselesin buǵan deıin de kótergen edik.