Kisi qolynan ólgen Saılybaevanyń enesi qaıda júrgeni anyqtaldy – Germanııa prokýratýrasy

ASTANA. KAZINFORM – Tergeý amaldary barysynda qaıtys bolǵan Aıgúl Saılybaevanyń enesi shetelde júrgeni anyqtaldy. Osy oraıda Kazinform agenttiginiń menshikti tilshisi ómiri qıylǵan jerlesimizdiń isine qatysty aqparat alý úshin Germanııa prokýratýrasyna saýal joldady.

«Tergeý amaldary jalǵasyp jatyr jáne qosymsha aıǵaqtarǵa taldaý jasaý qajet. Bul rette, qazir tergeý aıaqtalmaıdy. Sonymen qatar, qamaýǵa alynǵan kúdiktiler joq. Marqumnyń (A. Saılybaevanyń) enesi qazir shetelde bolýy múmkin degen málimet bar. Kúıeýi men balasynyń qaıda júrgenin anyqtaý tergeý amaldarynda qarastyrylmaǵan, sondyqtan biz bul másele boıynsha eshqandaı aqparat bere almaımyz», - dep atap ótilgen prokýratýra ókili Iens Noıbaýerdiń Kazinform agenttigine bergen jaýabynda.

Eske sala keteıik, azaptap óltirilgen eks-sýdıa Aıgúl Saılybaevanyń máıiti Germanııadan tabylǵan bolatyn.

Burynǵy sýdıanyń joǵalǵanyn onyń inisi Qanat Saılybaev habarlaǵan edi.

Artynsha nemis polıtsııasy QR azamaty Aıgúl Saılybaevanyń ólimine qatysty túsinik berdi.

Buǵan deıin 40 jastaǵy A.Saılybaeva Astananyń Saryarqa aýdanynda sýdıa bolyp qyzmet atqarsa, sońǵy ýaqytta Germanııanyń batysyndaǵy Benshaım qalasynda kúıeýi, qyzy jáne enesimen birge turǵan.

4 maýsym kúni tańerteń qyzyn balabaqshaǵa aparǵan. Sodan beri ony eshkim kórmegen. Onyń denesi qala shetindegi Erlache karerinen tabyldy.

Nemistiń BILD basylymynyń habarlaýynsha, áıeldiń máıiti polıetılen qapqa salynǵan, ólim aldynda azap kórgen. Aıgúl Saılybaevanyń qolynan, moınynan jáne betinen pyshaq jaraqaty tabyldy.

A.Saılybaevamen bir mezgilde Reseıden kelgen 49 jastaǵy qaıyn enesi Natalıa Dontsova joǵalyp ketti. 4 maýsymda ol nemeresin balabaqshadan úıine alyp kelgen. Sodan beri ony eshkim kórmegen.

Germanııada kóz jumǵan eks-sýdıa Aıgúl Saılybaeva Almatyda arýlap jerlendi.

Bıyl qyrkúıek aıynyń ortasynda kisi qolynan ólgen Aıgúl Saılybaevanyń enesi tabylmaı jatqany habarlanǵan edi.