Krýızdik laınerde tirkelgen hantavırýs jańa vaktsınany jasaýdy jedeldetti
ASTANA. KAZINFORM — Ulybrıtanııada ǵalymdar hantavırýsqa qarsy vaktsınany jasaý jumystaryn jedeldetti. Bul sheshim krýızdik MV Hondius kemesinde tirkelgen ınfektsııa órshýine baılanysty qabyldandy, dep habarlaıdy Euronews.
Mamandardyń aıtýynsha, qazirgi kezde osy vırýsqa qarsy arnaıy em nemese vaktsına joq.
Oqıǵaǵa deıin Ulybrıtanııadaǵy Bat ýnıversıtetiniń zertteý toby basqa shtamm — Hantaan vırýsyna qarsy eksperımenttik mRNQ-vaktsınasyn jasap jatqan. Ǵalymdar bul jobanyń jańa tásilge negizdelgenin jáne janýarlardaǵy klınıkaǵa deıingi synaqtarda úmitti nátıjeler kórsetkenin atap ótti.
Joba jetekshisi Asel Sartbaeva tehnologııanyń joǵary ımmýnogendiligin kórsetip, bolashaq hantavırýsqa qarsy vaktsınalardyń negizi bola alatynyn aıtty. Alaıda Andes shtammyna qarsy tıimdiligi áli rastalmaǵan jáne qosymsha zertteýdi qajet etedi.
Joba Ulybrıtanııa úkimetiniń qatysýymen damyp keledi. 2024 jyly úkimet termostabıldi mRNQ-vaktsına jasaý boıynsha kelisimshartqa qol qoıǵan. Onyń bir baǵyty — vaktsınany tereń muzdatýsyz joǵary temperatýrada saqtaýǵa múmkindik beretin «ensılıkatsııa» tehnologııasy.
Damytýshylar vaktsınany saqtaý temperatýrasyn -70°C-ten standartty tońazytqysh jaǵdaıyna deıin jetkizgenin, al bolashaqta bólme temperatýrasynda turaqtylyqqa qol jetkizýdi josparlap otyrǵanyn aıtady.
Sonymen qatar, Dúnıejúzilik densaýlyq saqtaý uıymy jaǵdaıdyń pandemııaǵa jatpaıtynyn, ári vırýs taralý qaýpiniń tómen ekenin habarlady. Ǵalymdar hantavırýs ınfektsııalary sırek kezdesetinin jáne COVID-19 sııaqty respıratorlyq vırýstar sııaqty ońaı juqpaıtynyn atap ótti.
Aıta keteıik, Densaýlyq saqtaý mınıstrligi hantavırýstyń aldyn alý joldaryn atady.
