Krýızdik kemelerdegi nemis týrısteri Parsy shyǵanaǵynda qalyp qoıdy

ASTANA. KAZINFORM — Taıaý Shyǵystaǵy daǵdarystyń ýshyǵýyna baılanysty myńdaǵan demalýshy Parsy shyǵanaǵy aımaǵyndaǵy krýızdik laınerlerde qalyp qoıdy. Bul óńirde AQSh-tyń áskerı bazalaryn Izraıl men AQSh soqqylaryna jaýap retinde Iran tarapy atqylap jatyr, dep habarlaıdy Euronews.

Kýágerlerdiń aıtýynsha, jeksenbi kúni tańerteń zymyran Mein Schiff 4 kemesiniń mańyna túsken. Atalǵan laıner qazirgi ýaqytta Abý-Dabı (Birikken Arab Ámirlikteri) aılaǵynda tur. Teńiz ústinde qara tútin býdaqtaǵany baıqalǵan, dep habarlady Bild basylymy.

Kemedegi jaǵdaı shıelenise túsken. Shamamen 2 500 jolaýshy men 1 000-ǵa jýyq ekıpaj múshesiniń arasynda zardap shekkenderdiń bar-joǵy ázirge belgisiz. Jeksenbi kúni shamamen 2 000 jolaýshy Dýbaıdan Germanııaǵa qaıtýy tıis bolǵan.

Mein Schiff 4-ten bólek, Mein Schiff 5 laıneri de zardap shekti. Ol Doha portynda tur.

Onyń jolaýshylary senbi kúni saparlaryn aıaqtap, Katar astanasy Dohadan Germanııaǵa ushyp ketýdi josparlaǵan. Olardyń keıbiri tipti ushaqtaǵy oryndaryna jaıǵasyp úlgergen kezde reıster toqtatylǵan. Jolaýshylardyń aıtýynsha, olar áýejaıda shamamen 10 saǵat kútip, keshke qaraı qaıtadan Mein Schiff 5 bortyna jetkizilgen. Jolaýshylar bagajdaryn áýejaıda qaldyrýǵa májbúr bolǵan.

Kemelerdiń bortynda qatań qaýipsizdik sharalary engizilgen: syrtqy palýbaǵa shyǵýǵa tyıym salynǵan, barlyq adamdar keme ishinde qalýy jáne múmkindiginshe terezelerden aýlaq júrýi tıis.

Mezgil-mezgil jolaýshylardyń smartfondaryna Katardyń azamattyq qorǵanys qyzmetinen jaqyndap kele jatqan zymyrandar týraly eskertý habarlamalary kelip túsip jatyr.

Eske sala ketsek, buǵan deıin Ulybrıtanııa AQSh-qa Iranǵa qarsy óz Áýe kúshteriniń bazalaryn paıdalanýǵa ruqsat bergenin jazdyq.