Krýızdik laınerdiń bortynda koronavırýs juqtyrǵandar sany 355 adamǵa jetti
TOKIO. QazAqparat – Japonııa úkimeti Tokıoǵa jaqyn jerde karantınde jatqan The Diamond Princess krýızdik laıneriniń ekıpaj músheleri men jolaýshylary arasynda koronavırýs juqtyrǵandar sany 355 adamǵa jetkenin málim etti, dep habarlaıdy QazAqparat.
Sondaı-aq, eldiń ishinde de koronavırýs juqtyrǵandar sany artyp keledi. Sarapshylar jaǵdaıdyń ýshyǵýy múmkin ekenin eskertip jatyr.
Densaýlyq saqtaý, eńbek jáne áleýmettik qamsyzdandyrý mınıstrligi aýrý juqtyrǵan 70 jolaýshynyń 38-iniń qyzýy kóterilmegenin jáne jótelmegenin habarlady. Kemede barlyǵy 1219 adam analız tapsyrǵan. Qazirgi ýaqytta kemede 3400 jolaýshy men ekıpaj músheleri bar, dep habarlaıdy Kyodo.
AQSh úkimetine qarasty eki ushaq kemeniń bortyndaǵy 400 AQSh azamatyn evakýatsııalaý úshin Japonııaǵa ushyp kelýi tıis. Kanada, Gonkong jáne Izraıl Japonııaǵa kemedegi óz azamattaryn evakýatsııalaý úshin charterlik reıs jiberýge daıyndalyp jatqanyn málimdedi.
Sondaı-aq, Japonııa keshe keshkisin indettiń oshaǵyna aınalǵan Ýhan qalasynan óz azamattaryn evakýatsııalaý úshin besinshi charterlik reısti jiberdi. 700-den astam adam elge oralǵan.
