Krýızdik laınerde 172 adam kóldeneńnen tap bolǵan aýrýǵa ushyrady
ASTANA. QazAqparat - Tynyq muhıtta saparda júrgen amerıkandyq Crown Princess krýız laınerinde 170-ten astam adam norovırýs (asqazan tumaýy) syrqatyna tap boldy. Bul týraly AQSh Densaýlyq saqtaý mınıstrliginiń aýrýlardy baqylaý jáne aldyn alý ortalyǵynyń (CDC) esebinde aıtylǵan, dep habarlady Lenta.rý.
Bortynda 3009 jolaýshysy men 1160 ekıpaj múshesi bar laıner Los-Andjelesten Gaıtıge 28 kúndik krýızdik saparǵa shyqqan. Qazirgi kezde bul aýrýdy 158 jolaýshy jáne 14 ekıpaj múshesi juqtyrǵan.
Qazir Crown Princess Los-Andjeleske jaqyndap keledi. Dúısenbi kúni San-Pedro qalalyq portyna kelgennen keıin laıner bortyna CDC qyzmetkerleri kóterilip, jaǵdaıdy óz kózderimen kóredi.
Kemeniń ıeger-kompanııasy Carnival plc bólmelerdi sanıtarlyq tazalaý sharalaryn qolǵa aldy. Kompanııa laınerdiń 29 qarashada bastalatyn kelesi krýızdik saparyna deıin keń aýqymdy tazalyq sharalaryn júrgizbek.
Asqazan tumaýy retinde belgili norovırýs indeti - juqpaly aýrýlardyń biri. Bul indet kóbine jolaýshylar kemelerinde paıda bolady jáne adamnan adamǵa tez taralady.
