Krýız laınerindegi 2 qazaqstandyqtan koronavırýs tabylǵan joq - Eljan Birtanov

NUR-SULTAN. QazAqparat – Densaýlyq saqtaý mınıstrligine Japonııadaǵy krýız laınerinde qalǵan qazaqstandyqtardyń analızderiniń qorytyndysy keldi, dep habarlaıdy QazAqparat tilshisi.

«Krýız laınerinde Qazaqstannan tórt adam bar. Biz búgin olardyń analızderiniń kóshirmesin aldyq. Ekeýinde koronavırýstyń tirkelmegeni anyq. Qalǵan eki adam boıynsha aqparatty kútýdemiz. Únemi baılanysta otyrmyz», - dedi Eljan Birtanov OKQ-da ótken baspasóz máslıhatynda.

Mınıstrdiń aıtýynsha, qazirgi ýaqytta laınerde qalǵan otandastarymyzdy elge qaıtarý jumysy júrip jatyr.

Budan buryn habarlanǵandaı, Japonııadaǵy krýız laınerinde qazaqstandyq 2 áıel pen eki bala bar ekeni belgili boldy. Óz kezeginde QR Syrtqy ister mınıstri Muhtar Tileýberdi «Diamond Princess» laınerindegi Qazaqstan azamattaryn elge jetkizý máselesine baılanysty túsinik bergen bolatyn.