Kirister komıteti tsıfrlyq maınıng naryǵyn qalaı baqylaıdy
ASTANA. KAZINFORM — El qazynasyna sońǵy úsh jylda 17 mlrd teńge kóleminde túsim tústi, onyń 14 mlrd teńgesi tsıfrlyq maınıng úshin tólem esebinen. Tolyǵyraq Memlekettik kirister komıteti tsıfrlyq aktıvterdi ákimshilendirý basqarmasynyń basshysy Talǵat Ádilov tarqatyp berdi.
— Salyqty baqylaýdy ákimshilendirý boıynsha kameraldyq baqylaý júrgizemiz. Jyl ishinde salyqtyń túsýin baqylaý aıasynda 11 mlrd teńge qamtamasyz etildi. Ol úshin ár túrli derekkóz qoldanylady, — dedi Talǵat Ádilov Kirister komıtetinde onlaın ótken brıfıngte.
Spıkerdiń aıtýynsha, ákimshilendirý barysynda energııa berýshi uıymdardyń deregi men elektrondyq derek, onyń ishinde shot-faktýra eskeriledi.
— Tsıfrlyq maınıng úshin tólem boıynsha energııa berýshi uıymdardan alynǵan málimetti jáne elektrondyq derekti, ıaǵnı elektrondyq shot-faktýrany eskere otyryp baqylaý júrgizemiz. Sonyń nátıjesinde 500 mln teńgeden astam maınıng tólemi qamtamasyz etildi, — deıdi ol.
Sondaı-aq Kirister komıtetiniń ókili, gaz óndirýshi uıymdarǵa jáne tólemdi tómendetken maınerlerge salyq tekserisi júrgizilgenin aıtty. Nátıjesinde memleketke qosymsha qomaqty túsim tústi.
— Salyq tóleýshilerdiń krıpto-ámııanyndaǵy tabys kólemi, qun ósimin jasyrmaýy, tsıfrlyq aktıvterdi kórsetpeýi jáne Salyq kodeksi aıasynda tsıfrlyq aktıvter týraly zań talaptarynyń saqtalýyn tekseremiz, — dedi ol.
Qazir jańa Salyq kodeksiniń qabyldanýyna baılanysty ózgerister kútilip otyr.
— Jańa Salyq kodeksin qabyldaýǵa oraı normatıvtik-quqyqtyq aktiler de qabyldanbaq. Onyń aıasynda tsıfrlyq aktıvterdiń tizimin keńeıttik. Qazir olardyń sany — 114. Bul qundy bırja, maınıng-pýl. Bul salyq tóleýshilerge yńǵaıly, — dep tolyqtyrdy ol.
Onyń aıtýynsha, búginde elimiz krıptovalıýta boıynsha halyqaralyq salyqtyq aqparat almasýǵa daıyndalyp jatyr. 2027 jyldan bastap 60-tan astam el ózara ıýrısdıktsııamen tsıfrlyq aktıvter boıynsha mámileler jónindegi aqparat almasady. Bul rezıdentter men rezıdent emesterdiń tsıfrlyq aktıvterdi satyp alý-satý operatsııasyn baqylaýǵa múmkindik beredi.
Sonymen qatar maman tsıfrlyq maınıng úshin tólem boıynsha 880-nysan ózgertilgenin aıtyp otyr.
— Onyń aıasynda qosymshada elektr energııasy beriletin birinshi jáne ekinshi sanattaǵy maınerdi kórsetýdi engizdik. Bul derek ákimshilendirý barysynda tsıfrlyq maınıng úshin tólemdi durys esepteý úshin qoldanylady, — deıdi Talǵat Ádilov baspasóz máslıhatynda.
Onyń aqparatyna sáıkes, 2026 jylǵy qańtardan bastap zańdy tulǵalar tsıfrlyq aktıvti satqan kezde qun ósimin esepteýge mindetteledi.
— Búginde atalǵan tabys túri zańdy tulǵalar tarapynan jalpy aınalymda kórsetiledi, — dep túsindirdi ol.
Eske salaıyq, Qazaqstanda maınıngpen aınalysatyndar qalaı jumys isteıtini týraly jazǵan bolatynbyz.
Aıta keteıik, búginde Shyǵys Qazaqstan oblysynda 9 mlrd teńgeniń zańsyz elektr saýdasy, ıaǵnı maınıngke qatysty is tergelip jatyr.