Kiris pen múlik deklaratsııasyn kimder jáne qalaı tapsyrady

ASTANA. KAZINFORM — 2026 jyldan bastap jeke tulǵalarǵa arnalǵan kirister men múlik týraly 270.00 nysanyndaǵy deklaratsııany tapsyrý erejelerine ózgerister engizildi. Bul týraly Qarjy mınıstrligi Memlekettik kirister komıtetiniń Jeke tulǵalardyń kiristerin ákimshilendirý basqarmasynyń bas sarapshysy Gúlden Hasenova habarlady. 

270-deklaratsııany kimder tapsyrýy tıis?

— 270-deklaratsııa tek jeke tulǵalarǵa arnalǵan. Zańdy tulǵalar nemese jeke kásipkerler ony tapsyra almaıdy. Kásipker tek jeke tulǵa retinde tabys alǵan nemese deklaratsııalaýǵa jatatyn aktıvteri bar jaǵdaıda tapsyra alady, — dedi Gúlden Hasenova tikeleı efırde.

Sarapshynyń aıtýynsha, deklaratsııany mindetti túrde tapsyrýǵa tıis adamdar qataryna:

· memlekettik qyzmetshiler men olarǵa teńestirilgen tulǵalar jáne olardyń jubaılary;

· zańdy tulǵalardyń basshylary, quryltaıshylary, qatysýshylary jáne olardyń jubaılary;

· derbes salyq salýǵa jatatyn kiris alǵan jeke tulǵalar, mysaly páterdi jalǵa berý, baǵaly qaǵazdardan túsetin tabys nemese bir jyldan az ýaqyt ıelik etken aktıvterdi satýdan túsken paıda;

· jyl sońynda shetelde aktıvteri bar qazaqstandyqtar;

· 2025 jyly quny 20 myń AEK-ten (shamamen 78 mln teńge) asatyn múlik satyp alǵandar;

· salyqtyq shegerimderdi qoldanǵandar, mysaly kópbalaly otbasylar nemese balalardyń oqýy boıynsha.

— 250 jáne 270-deklaratsııa 2026 jylǵy 15 qyrkúıekten keshiktirmeı tapsyrylady. Merzim ótkizilip qalsa, Ákimshilik kodekstiń 272-baby boıynsha birinshi ret eskertý jasalady, keıin aıyppul salynady, — dep eskertti Gúlden Hasenova.

Sondaı-aq, ol eger zańbuzýshylyq bir jyl ishinde qaıtalansa, 15 aılyq eseptik kórsetkish kóleminde aıyppul salynatynyn aıtty. Al deklaratsııada tolyq emes nemese jalǵan málimet kórsetkenderge de zańnamaǵa sáıkes ákimshilik jaýapkershilik qarastyrylǵan.

Deklaratsııany tapsyrý joldary:

1. Salyq organdaryna nemese HQKO-ǵa baryp, jeke toltyrý;

2. Poshta arqyly jazbasha túrde jiberý (mórtaban 15 qyrkúıekke deıin bolýy tıis);

3. Elektrondy túrde — «Salyq tóleýshiniń kabıneti», eGov mobile, E-Salyq Azamat qosymshalary nemese keıbir bankterdiń mobıldi qosymshalary arqyly.

Al 250.00 nysanyndaǵy aktıvter men mindettemeler týraly deklaratsııany tek memlekettik qyzmetke kandıdattar, iri bankterdiń qatysýshylary jáne shetelde aktıvteri bar azamattar tapsyrady. Bul deklaratsııa bir ret beriledi jáne jyl saıyn tapsyrý mindetti emes.

Eske sala keteıik, astanalyqtarǵa kólik salyǵyn 1 sáýirge deıin tóleý eskertildi.