Kirpish jáne tsement zaýyttaryn qarjylandyrmaımyz – Serik Jumanǵarın
ASTANA. KAZINFORM – Premer-mınıstrdiń orynbasary Serik Jumanǵarın Senatta ótip jatqan Úkimet saǵatynda 12,6 paıyzdyq ınvestıtsııalyq kredıtter bıznestiń qaı salasyna beriletinin aıtty.
Senatorlar «Báıterek» ulttyq basqarý holdıngi arqyly iri bızneske beriletin 12,6 paıyzdyq kredıttiń mólsherlemesin salanyń tabystylyǵyna qaraı saralap qaraý máselesin kótergen bolatyn.
Serik Jumanǵarın bul mólsherleme Ulttyq banktiń bazalyq mólsherlemesine negizdelip belgilengenin aıtyp, sala boıynsha saralap mólsherleme taǵaıyndaý qazir múmkin emes ekenin aıtty.
- Biz bızneske beriletin kredıtterdiń basym baǵyttaryn qatań túrde tańdap aldyq. Máselen, gaz bloktardyń óndirisin, kirpish jáne tsement zaýyttaryn qarjylandyrmaımyz. Onyń máni joq. Elde ol óndirister jetkilikti deńgeıde bar. Bólinisi joǵary metallýrgııa, sırek jer metallýrgııasy, munaı hımııasy, kómir-sýtek hımııasy, azyq-túligin óńdeý salasy, kólik jáne logıstıka, ІT-sala salasy basym baǵytta bolady. Týrızmde de iri jobalar bolýy múmkin. Onyń ózinde ınfraqurylymǵa qarjy salynady. Óıtkeni salany damytýǵa ınfraqurylym jetpeı jatyr, - dedi Serik Jumanǵarın.
Buǵan deıin Úkimet «Báıterek» holdınginiń ekonomıkalyq jobalarǵa quıatyn kapıtal kólemin 1 trln teńgege arttyrǵanyn jazǵan edik.