Krıt aralyndaǵy orman órtinen úsh órt sóndirýshi qaza tapty
ASTANA. KAZINFORM – Grekııanyń Krıt aralyn sharpyǵan orman órtteri ekinshi kún qatarynan jalǵasyp jatyr, dep habarlaıdy AZERTADJ.
Qatty jel men joǵary aýa temperatýrasy tilsiz jaýdy aýyzdyqtaýǵa kedergi keltirip otyr.
Krıt aralyndaǵy órtti sóndirý kezinde eki órt sóndirýshi, al Peloponnes óńirinde taǵy bir órt sóndirýshi qaza tapqan. Budan bólek, eki qyzmetker jeńil jaraqat alǵan.
Qazirgi ýaqytta Krıtte 200-den astam órt sóndirýshi, ondaǵan arnaıy tehnıka men órt sóndirý avıatsııasy jalynnyń taralýyn toqtatýǵa kúsh salyp jatyr. Alaıda kúshti jel áýe arqyly júrgiziletin operatsııalardyń tıimdiligin tómendetip, órttiń jańa aýmaqtarǵa taralýyna sebep bolyp otyr.
Órt saldarynan turǵyn úıler, qoımalar, záıtún baqtary men aýyl sharýashylyǵy alqaptary zardap shekti. Qaýipsizdik maqsatynda júzdegen jergilikti turǵyn men týrıst evakýatsııalandy.
Grekııanyń Azamattyq qorǵanys qyzmeti eldiń birqatar óńirinde órt qaýpiniń deńgeıi áli de joǵary ekenin málimdedi. Bılik turǵyndardy qaýipsizdik qyzmetiniń nusqaýlaryn qatań saqtaýǵa jáne qaýipti aımaqtarǵa barmaýǵa shaqyrdy.
Mamandardyń aıtýynsha, Jerorta teńizi óńirindegi aptap ystyq, uzaqqa sozylǵan qurǵaqshylyq pen qatty jel orman órtteriniń óte jyldam taralýyna yqpal etip otyr.
Sońǵy kúnderi Frantsııa, Ispanııa jáne Grekııada bir mezgilde tutanǵan iri orman órtteri Eýropadaǵy tótenshe jaǵdaılar qyzmetteriniń jumysyna aıtarlyqtaı salmaq túsirdi.
Sondaı-aq, Eýropalyq komıssııanyń Tótenshe jaǵdaılarǵa den qoıýdy úılestirý ortalyǵy aldaǵy kúnderi, ásirese Grekııa men Italııada orman órtteriniń qaýpi odan ári kúsheıetinin eskertti.
