Krıstına Shýmekova Germanııadaǵy álem chempıonatynda taǵy da úzdik shyqty

ASTANA. KAZINFORM —  Germanııanyń Intsell qalasynda ótip jatqan jasóspirimder arasyndaǵy álem chempıonatynda qazaqstandyq sportshy úshinshi altyn medalin jeńip aldy.

Bul joly otandasymyz 1000 metr qashyqtyqta 1:16.34 ýaqyt kórsetkishimen qarsylastarynan ozyp, máre syzyǵyn birinshi bolyp kesti.

Sondaı-aq Qazaqstan quramasynyń ózge sportshylary da baq synady. Atap aıtsaq, Anastasııa Belovodova 1:17.99 nátıjesimen jetinshi orynǵa turaqtasa, Varvara Glýhova 32-satydan kórindi.

Aızada Rymbek jarysty 34-orynmen aıaqtady. Esterińizge sala keteıik, buǵan deıin Krıstına Shýmekova 500 jáne 1500 metr qashyqtyqtarynda da top jaryp, eki birdeı altyn medal enshilegen bolatyn.

Osylaısha, otandasymyz jasóspirimder arasynda úsh dúrkin álem chempıony atanyp otyr.

Aıta ketelik Krıstına Shýmekova rekord jańartyp, jasóspirimder arasynda álem chempıony atanǵan edi.