Krıstın Lagard Nazarbaev Ýnıversıtetiniń bolashaqtaǵy prezıdenti bolýy múmkin - Shıgeo Katsý
ASTANA. QazAqparat - Nazarbaev Ýnıversıtetiniń prezıdenti Shıgeo Katsý Halyqaralyq valıýta qorynyń basshysy Krıstın Lagard aldaǵy ýaqytta óz ornyn basyp, bilim ordasyn basqarýy múmkin ekendigin aıtty.
Mundaı pikirin ol búgin atalǵan joǵary oqý ornynda ótken onlaın-kórsetilim dáristi aıaqtaı kele qaljyń túrinde bildirdi.
Krıstın Lagard Nazarbaev Ýnıversıteti stýdentterine jahandyq jáne óńirlik ahýal, sonymen birge Qazaqstan úshin syn-qaterler men múmkinshilikter taqyrybynda dáris oqydy. Dáris sońynda ol stýdentterdiń saýaldaryna jaýap berdi.
Osydan keıin sóz alǵan Shıgeo Katsý munyń stýdentterdiń ýnıversıtettiń bolashaq prezıdentiniń dárisin tyńdaǵandyqtary da bolýy múmkin ekendigin qaljyń retinde aıtty.
Aıta keterligi, K.Lagard Qazaqstanǵa kelgenge deıin «QazAqparat» halyqaralyq aqparat agenttigine eksklıýzıvti suhbat bergen bolatyn. 24 mamyrda Qazaqstan Prezıdenti Astana ekonomıkalyq forýmy aıasynda elimizge Halyqaralyq valıýta qorynyń óńirlik konferentsııasyna qatysý úshin keletin Halyqaralyq valıýta qorynyń ókimshi-dırektory Krıstın Lagardpen kezdesý ótkizedi dep kútilýde.
Qazaqstan Respýblıkasynyń Prezıdenti Nursultan Nazarbaevtyń bastamasymen qurylǵan «Nazarbaev Ýnıversıteti» derbes bilim berý uıymynyń alǵa qoıǵan mindeti - Qazaqstannyń halyqaralyq deńgeıdegi tuńǵysh zertteý ýnıversıteti bolý, sebebi onyń qyzmeti eldiń negizgi basymdyqtarynyń iske asyrylýyna, onyń ishinde zertteý áleýetiniń jedel qarqynmen ósýine, eldiń ındýstrııalyq-ınnovatsııalyq damýyna, ózgerip otyratyn jáne jahandyq yqpaldastyrylǵan ekonomıka talaptaryna saı keletin bilim berýge kóshýdiń qamtamasyz etilýine baılanysty.
Ýnıversıtettegi oqý protsesi halyqaralyq bilim berý standarttary negizinde qurylǵan, bul Qazaqstan Respýblıkasy bilim jáne ǵylym júıesiniń qarqyndy damýyna jáne álemdik deńgeıge kóterilýine múmkindik beredi. Bul - qyzmeti derbestik jáne akademııalyq erkindik qaǵıdattaryna negizdelgen Qazaqstandaǵy eń alǵashqy ýnıversıtet. Ýnıversıtetke derbestik mártebesi «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» Qazaqstan Respýblıkasynyń 2011 jylǵy 19 qańtardaǵy Zańyna sáıkes berildi.
