Ronaldý jankúıerlerinen keshirim surap, ulttyq quramadaǵy mansabyn aıaqtamaıtynyn málimdedi
ASTANA. KAZINFORM — Saýd Arabııasynyń «Ál-Nasr» klýbynyń shabýylshysy ári kapıtany, «Altyn doptyń» bes dúrkin ıegeri Krıshtıaný Ronaldý Portýgalııa ulttyq quramasynan óz betinshe ketip qalǵany úshin keshirim surady.
Portýgalııalyq fýtbolshy bul týraly Instagram paraqshasynda málimdedi.
— Maǵan berilgen ýádeniń budan ári de buzylǵanyn kútpeı, ulttyq quramadan ketýge sheshim qabyldadym. Olar biraýyzdan meniń ornym ulttyq quramada ekenin aıtty. 25 jylǵa jýyq mansabymda eshqashan qandaı da bir jattyqtyrýshynyń nemese ulttyq quramanyń bapkeriniń tehnıkalyq ne taktıkalyq sheshimderine aralasqan emespin, — dep jazdy Ronaldý.
Fýtbolshy ulttyq quramadaǵy áriptesteri men jankúıerlerinen óz áreketi úshin keshirim surady.
— Portýgalııa halqynan keshirim ótinemin. Alaıda maǵan berilgen ýádeniń oryndalmaýy osyndaı sheshim qabyldaýyma áser etti. Bapkerdiń ýádesine kóp adam kýá, olar muny rastaı alady. Soǵan qaramastan, men bulaı jasamaýym kerek edi. Jaýapkershilik tek meniń moınymda, — dedi fýtbolshy.
Ronaldý halyqaralyq mansabynyń tek qoshtasý matchymen aıaqtalǵanyn qalamaıtynyn da aıtty. Onyń sózinshe, mundaı kezdesýler ótkizýge áli ýaqyty bar. Qazir ol Portýgalııa quramasymen birge jarystarǵa qatysyp, jeńiske jetýdi jalǵastyrǵysy keledi. Sondaı-aq Portýgalııa fýtbol federatsııasy tarapynan qandaı da bir jaza taǵaıyndalsa, ony qabyldaýǵa daıyn ekenin málimdedi.
— Men barlyq jankúıerime, ásirese barlyq portýgalııalyqqa ýáde bere alamyn. Bizde bir nemese birneshe qoshtasý matchy bolady. Oǵan áli ýaqyt bar. Sondyqtan densaýlyǵym jaqsy bolyp, klýbymda oınap, gol soǵyp júrsem, maǵan taǵaıyndalýy múmkin dıskvalıfıkatsııadan keıin de ulttyq qurama sapynda oınaýǵa daıynmyn. Buǵan deıingi kúnderdegideı, ulttyq qurama úshin óner kórsetip, jeńiske jetý úshin árdaıym komandadan tabylamyn, — dep atap ótti ol.
Buǵan deıin 41 jastaǵy Ronaldý Ulttyq quramanyń bas bapkeri ótkizgen baspasóz máslıhatynan keıin jáne Portýgalııa fýtbol federatsııasynyń prezıdentimen sóılesken soń quramanyń sapynan ketý týraly sheshim qabyldaǵanyn aıtqan bolatyn. Sondaı-aq ýaqyty kelgende ulttyq quramadan ketýge túrtki bolǵan sebepterdiń aq-qarasyn búkil Portýgalııa halqyna aıtyp beretinin de málimdegen edi.
