Krıshtıaný Ronaldý karantınnen shyqqan boıda qos goldyń avtory atandy

Italııa chempıonatynyń altynshy týrynda ataqty fýtbolshy, qazir bapker Andrea Pırlonyń shákirtteri syrt alańda «Spetsııa» komandasymen kezdesti.

«ıÝventýs» ótken maýsymda kezekti chempıondyq ataqqa qol jetkizse, «Spetsııa» birinshilikke bıyl qosylǵan edi.

K.Ronaldýdan koronavırýs anyqtalyp, karantınge ketkennen keıin týrındik klýb el chempıonatynda taǵy bir debıýtant «Krotonemen», sosyn óz alańynda «Veronamen» 1:1 esebimen teń oınap, altynshy orynǵa syrǵyp ketken edi. Onyń ústine Chempıondar lıgasynda óz alańynda «Barselonaǵa» 0:2 esebimen ese jiberdi.

«Spetsııamen» oıyn da «ıÝventýsqa» ońaıǵa túsken joq. Birinshi taımda Alvaro Morata esep ashqanmen, alań ıelerinen Tommazo Pobega 11 metrlikten tarazy basyn teńestirip úlgerdi. Ekinshi taımda da esep birazǵa deıin ózgergen joq. Mine, osy kezde A.Pırlo 58-mınýtta argentınalyq Paýlo Debalanyń ornyna K.Ronaldýdy oıynǵa qosty. Arada bir mınýt ótpeı jatyp, A.Moratadan keremet pas alǵan K.Ronaldý qaqpashyny da op-ońaı aldap ótip, gol soqty. Sodan keıin taǵy bir tyńnan qosylǵan oıynshy Adrıen Rabo sheberligimen tanyldy – 3:1. Al 77-mınýtta K.Ronaldý 11 metrlik aıyp dobyn dál oryndap, esepti 4:1-ge jetkizdi.

Osylaısha 12 upaı jınaǵan «ıÝventýs» týrnır kestesinde ekinshi orynǵa kóterildi. Bıylǵy chempıonatty tamasha bastaǵan «Mılan» klýby 16 upaımen jekedara kósh bastap keledi. 6-týrda Stefano Pıolıdyń shákirtteri syrt alańda «Ýdınezeni» 2:1 esebimen tize búktirdi. Bul matchta 39 jastaǵy shvetsııalyq Zlatan Ibragımovıch jeńis golyn soǵyp, óziniń áli de babynda ekendigin tanyta bildi.

Chempıondar lıgasynda G tobynda 3 upaımen ekinshi orynda kele jatqan «ıÝventýs» 4 qarasha kúni syrt alańda majarstandyq «Ferentsvarosh» klýbymen kezdesedi. Majarstandyq komandanyń quramynda kezinde «Qaıratta» óner kórsetken brazılııalyq Isael oınaıdy.

Eske sala keteıik, budan buryn K.Ronaldýdyń koronavırýs juqtyrǵanyn jazǵan bolatynbyz.