Krıshtıaný Ronaldý ıslamǵa bet bura bastady ma? - BAQ
ASTANA. 24 mamyr. QazAqparat - Áıgili fýtbolshy, Portýgalııa quramasy men ıspandyq «Real Madrıd» komandasynyń serkesi Krıshtıaný Ronaldý ıslam dinin qabyldaýy múmkin degen aqparat sońǵy kezderi BAQ-ta jıi shyǵyp júr. Sonyń qatarynda «Alaman» ulttyq sport portaly da «Aladop» saıtyna silteme jasap «Krıshtıaný men Islam» taqyrybynda maqala jarııalapty.
«Krıshtıaný Ronaldýdyń esimi fýtbol tarıhynda máńgi qalary anyq. Ol óz dáýiriniń keremet oıynshysy. Portýgaldyq fýtbolshydaı doppen óte jyldam júgire alatyn adam bul ómirde neken-caıaq. Ózderińiz biletindeı bir dinniń adamy, kúlli álemge tanylǵan soń tulǵa, ıdol, jalpyhalyqtyq pirge aınalýy múmkin. Al dál sondaı qasıeti, qabileti bar adam ózge dinge ótse onda sanany silkindiretindeı, óziniń bir ǵana sol qadamymen mıllıondardyń ómirine áser ete alatyn jaıy bar. Mysaly, Muhamed Álı, Maık Taıson sekildi sportshylar ıslam dinine ótip, kópshiliktiń nazaryn baýrady. Álı menen Taıson sekildi qadamǵa endi jaqyn arada taǵy bir juldyz qosylýy ábden yqtımal. Ol - Krıshtıaný Ronaldý.
Ronaldý jas kezinde, ıaǵnı fýtboldy endi bastap kele jatqanynda qyzýqandy boldy. «MıÝ» sapyna aýysysymen onyń «sımýlıatsııa» jasaıtyn qasıetine kópshilik keri baǵasyn berdi. Kúıesin jaqty. Eýronyń fınalynda jylaǵan kezinde ony jalpy jurtshylyq «jylaýyq» dep mazaqtady. Osy oqıǵaǵa baılanysty tipti anekdot ta shyqty. Biraq, ýaqyt óte kele Krıshtıanýdyń alańdaǵy óneri, onyń arqasynda soǵylǵan goldardyń mańyzy arta tústi. Ony buryn syılamaǵan jankúıerler oılarynan qaıta bastady. Osy kúni kúlli álemdegi jankúıerlerdiń ishinde Messıdi óte qatty jaqsy kóretinder ǵana Krıshtıanýdy moıyndamaıdy. Áıtpese jer jahanǵa aty shyqqan oıynshynyń dańqy asqaqtap tur. Endi onyń Messımen arasyndaǵy básekelestikte Ronaldý úshin artyqshylyq paıda bolmaq. Ol ne artyqshylyq, ne degen basymdylyq? Krıshtıaný ıslamǵa bet burmaq.
Mysaly «MıÝ» jankúıerleriniń shırek paıyzy musylmandar. Bul degenimiz jarty mıllıard adam! Al jer betinde qanshama musylman-jankúıer bar. Olardyń ishinde ıaǵnı musylman-jankúıerlerdiń ishinde Messıdi qurmetteıtinder bar. Olardyń endigi oıy ózgermek pe? Árıne, sebebi fýtbol ultqa, dinge, dilge bólinetinin áldeqashan dáleldep qoıǵan. Ronaldýdyń musylman bolyp ketýine zor yqpal jasap júrgen Mesýt Ózildi keıingi jurt qalaı qurmetteıdi?! Onyń da ataǵy kún sanap sharyqtap barady. Zınedın Zıdan ol týmasynan musylman edi. Frank Rıberıde ıslamdy qabyldady ǵoı, nege ol da álemdik masshtabtaǵy juldyzǵa aınalmady dep surarsyz. Tek ózge dinge ótý jetkiliksiz. Ónerińmen kópshiliktiń júregin jaýlaý qajet. Fýtbolshynyń túr-tulǵasynyń ózi, júris-turysy onyń tegin adam emestigin dáleldep turady.
Mesýt Ózil Krıshtıanýdyń «fatıha» súresin jattap, ári sol súreni jaqsy kóretindigin aıtypty. Demek, Ronaldýdyń kókireginde sáýle paıda bolǵan, júregine ıman qona bastaǵany. Arab kompanııasynyń jarnamasyna túskennen soń oǵan, qymbat áshekeı tastarmen kómkerilgen portýgal tiline aýdarylǵan Quran syıǵa tartylypty. Ol bul syıdyń endigi qadirin biledi. «Bul syıdy men úıimdegi eń qurmetti jerge qoıamyn», - depti Krıshtıaný.
Messı jyl saıyn «Altyn býtsany» ıelenip júr, Krıshtıanýda ekeý-aq bul marapat. Ony da ártúrli sýretke kelemej qylyp keltirip júr fanattar. Sol 2011 jyly alǵan «Altyn býtsany» Ronaldý aýktsıonda satyp, túsken qarjyny túgel Palestınadaǵy balalarǵa aýdarǵan. Bul árıne, áýlıelik dep aıta almaımyz, degenmen sol jolda júrgen adamnyń isi ekendigi haq», delingen materıalda.
«Sońǵy kezde «Realdyń», Krıshtıanýdyń oıynyn kórip otyryp eshqandaı sımýlıatsııa, eshqandaı da bir tómen dárejeli qylyq kórsetkenin baıqamadyq. Ol shynymen de endigi óziniń qandaı adam ekendigin tanyp kele jatqandaı. Sabyrǵa shaqyryp, óz-ózin kúlli halyq aldynda taza ustaǵandy jón sanaıtyndaı. Túbi ol ózin ıslamǵa alyp keletinine men óz basym kámil senemin» dep túıindeıdi maqala avtory.
