Krıshtıaný Ronaldý fýtboldan álem chempıonatynyń favorıtterin atady

ASTANA. QazAqparat – Portýgalııa quramasynyń shabýylshysy Krıshtıaný Ronaldý Katarda fýtboldan ótip jatqan álem chempıonatynyń favorıtterin atady, dep habarlaıdy QazAqparat tilshisi.

Onyń sózine qaraǵanda, Portýgalııa favorıtter qatarynda joq. Degenmen portýgalııalyqtar 2016 jyly Eýropa chempıonatynda jeńiske jetken kezindegideı oınasa, kópshilikti tańǵaldyrýy múmkin.

«Portýgalııanyń múmkindigi mol. Biraq biz áýeli Ganamen ótetin matchty oılaýymyz kerek. Myqty bolsaq, birinshiliktiń aıaǵyna deıin jetemiz. Chempıon atanǵan komanda ǵana týrnırde úzdik atanady. Bizde jas fýtbolshylar, jaqsy oıynshylar bar. Jarystyń favorıtterine keler bolsaq, Brazılııa, Argentına, Frantsııa, Ispanııa, Germanııa aldymen aýyzǵa iligedi. Olar basqalardan oq boıy ozyq tur. Alaıda Portýgalııa 2016 jyly óziniń kúshti ekendigin kórsete bildi», dedi Ronaldý.

Portýgalııa H tobynda Ýrýgvaı, Gana, Ońtústik Koreıa quramalarymen birge óner kórsetedi. Ronaldý komandasy 24 qarashada Ganamen, 28-inde Ýrýgvaımen, 2 jeltoqsanda Ońtústik Koreıamen sheberlik baıqasady. Bulardyń qaı-qaısysy da ońaı shaǵylatyn jańǵaq emes, sondyqtan toptan shyǵý úshin kóp kúsh jumsaý kerek.

37 jastaǵy K.Ronaldý úshin bul sońǵy álem chempıonaty bolýy da ǵajap emes. Sondyqtan onyń komandalastarymen birge baryn salatyny anyq.

Eske sala keteıik, budan buryn fýtboldan bıylǵy «Altyn do» ıegeriniń álem chempıonatynan tys qalǵanyn jazǵan bolatynbyz.