Krıshtıaný Ronaldý Eýro-2016 fınalynda jaraqat alyp, alǵashqy taımda alańnan ketti

PARIJ. QazAqparat - Portýgalııa shabýylshysy Krıshtıaný Ronaldý jaraqat alýyna baılanysty fýtbol alańyn tastap shyqty.

Birinshi taımnyń 8 mınýtynda Krıshtıaný Ronaldý Frantsııa quramasynyń oıynshysy Dımıtrı Paıetpen soqtyǵysyp qaldy. Frantsýz quramasynyń oıynshysy portýgaldyqty tizesinen soǵyp ótken. 

Bastapqyda Ronaldý jaraqaty jeńil sekildi kóringen, aýyrsynǵanyna qaramastan syltı basyp oınap júrdi. Alaıda 25 mınýtta portýgaldyq alańǵa jata ketip, medıtsınalyq kómek surady. Ronaldýdy zembilge salyp alyp ketti, ol jylap jatty. Stadıondaǵy jankúıerler oǵan túregep turyp qol soǵyp qoldaý bildirdi. Ony alańda Rıkardý Kýarejma almastyrdy.