Krıshtıaný Ronaldý «Ál-Nasrmen» kelisimshartty 2026 jylǵa deıin uzartady

ASTANA. KAZINFORM – «Altyn doptyń» bes dúrkin ıegeri, portýgalııalyq shabýylshy Krıshtıaný Ronaldý Saýd Arabııasynyń «Ál-Nasr» fýtbol klýbymen kelisimshartyn uzartady. Bul týraly portýgalııalyq A Bola gazeti habarlady, dep jazady Report.

Derekkózdiń aıtýynsha, kelisim 2026 jyldyń maýsymyna deıin jalǵasady. Ronaldýdyń «Ál-Nasrmen» qazirgi kelisimsharty 2025 jyldyń maýsymynda aıaqtalady.

Ronaldý 39 jasta, ol 2023 jyldan beri «Ál-Nasr» quramynda oınaıdy. Osy maýsymda portýgalııalyq fýtbolshy klýb sapynda 20 match ótkizip, 17 gol soǵyp, 3 nátıjeli pas berdi.

Ronaldý – Chempıondar lıgasynyń bes dúrkin jeńimpazy, Eýropa chempıony, Ulttar lıgasynyń jeńimpazy, ulttyq quramalar, Eýropa chempıonattary, Chempıondar lıgasy, klýbtar arasyndaǵy álem chempıonattary tarıhyndaǵy úzdik bombardır. Ronaldý resmı matchtarda 900-den asa gol soqqan alǵashqy fýtbolshy boldy. Portýgalııalyq shabýylshy bes ret «Altyn dop» ıegeri atanǵan.

Aıta keteıik, buǵan deıin Ronaldý dýbl jasap, 915-shi golyn soqqany jáne álemdik rekord ornatqany týraly jazǵan bolatynbyz.

Sondaı-aq, Ronaldý «Ál-Nasr» klýbyna Zıdandy bas bapker etýdi surady.