Krıshtıaný Ronaldý «Ál-Nasr» sapynda alǵashqy chempıondyq tıtýlyn jeńip aldy
ASTANA. KAZINFORM – Portýgalııalyq fýtbol juldyzy Krıshtıaný Ronaldý óner kórsetetin «Ál-Nasr» klýby Saýd Arabııasy chempıonatynyń jeńimpazy atandy, dep habarlaıdy Kazinform agenttiginiń tilshisi.
Chempıonattyń sońǵy, 34-týry aıasynda «Ál-Nasr» óz alańynda «Damakty» 4:1 esebimen jeńdi.
Kezdesýdi alań ıeleri belsendi bastap, alǵashqy mınýttardan oıyn tizginin óz qolyna aldy. Matchtyń 34-mınýtynda Sadıo Mane buryshtamadan asyrylǵan dopty sátti paıdalanyp, esep ashty.
Ekinshi taımda komanda basymdyǵyn arttyrdy. Krıshtıaný Ronaldýdyń nátıjeli pasynan keıin Kıngslı Koman gol soqty.
Qonaqtar penaltıden bir dop aıyrmasyn qysqartqanymen, keıin basymdyq qaıtadan «Ál-Nasrǵa» ótti. Ronaldý aldymen aıyp dobynan mergendik tanytsa, keıin oń qaptaldan berilgen pastan keıin dýbl avtory atandy.
Osylaısha match 4:1 esebimen «Ál-Nasrdyń» paıdasyna aıaqtaldy.
Maýsym qorytyndysy boıynsha klýb Saýd Arabııasy chempıonatynyń altyn medalin ıelendi. Bul Krıshtıaný Ronaldý úshin saýdııalyq klýb sapyndaǵy alǵashqy resmı júlde boldy. Portýgalııalyq shabýylshy maýsymnyń sońǵy oıynynda eki gol soǵyp, bir nátıjeli pas berdi.
Aıta keteıik, bıyl aqpan aıynda Portýgalııa quramasy men «Ál-Nasr» shabýylshysy Krıshtıaný Ronaldý Saýd Arabııasynan ketpeıtinin málimdegen edi.
Sondaı-aq osy jyldyń qańtar aıynda vandal Portýgalııada Krıshtıaný Ronaldýdyń músinin órtep jiberdi.
