Krıptovalıýtany meıramxanalarda da qabyldaıdy - depýtat Qaraǵusova
ASTANA. QazAqparat - Búgin Parlament Májilisinde «Valıýtalyq retteý jáne valıýtalyq baqylaý týraly» zań jobasy tanystyryldy. Alaıda atalǵan qujatta krıptovalıýta jaıynda eshteńe aıtylmaǵan, dep xabarlaıdy QazAqparat tilshisi.
Depýtat Gúljan Qaraǵusovanyń aıtýynsha, krıptovalıýta naryǵy baqylaýǵa alynbasa da, qazaqstandyqtar ony aıyrbas quraly retinde paıdalanyp júr. "Astanany bir aınalyp ótseńiz, krıptovalıýtanyń aıyrbas quralyna aınalǵanyn kóresiz. Ony qabyldaıtyn saýda uıymdary da bar. Kólik saýdasy ǵana emes, keıbir meıramxanalarda da qyzmet úshin krıptovalıýtany alady. Sondyqtan ony moıyndaımyz ba, joq pa, qazir krıptovalıýta aınalymy bar. Atalǵan valıýtany tólem quraly retinde de, jınaq retinde de paıdalanady", - dep atap kórsetti G.Qaraǵusova.
Aıta keteıik, depýtattar krıptovalıýta naryǵyn tezdetip baqylaýǵa alýdy talap etti. Sebebi atalǵan másele úleskerler problemasy sııaqty ýshyǵyp ketýi ábden múmkin. Ulttyq bank tóraǵasynyń orynbasary Oleg Smolıakov krıptovalıýtaǵa qatysty banktiń ustanymyn jetkizdi.
