Krıptovalıýtany baqylaýǵa almasaq, erteń úlken shý bolady - Ásel Jıenbaeva
ASTANA. QazAqparat - «Astana» HQO tsıfrlyq tehnologııalar jónindegi dırektory Ásel Jıenbaeva krıptovalıýta naryǵyn tezdetip baqylaýǵa alýǵa keńes berip otyr, dep habarlaıdy QazAqparat tilshisi.
«Búginde Qazaqstanda kóp adamdar páterlerin, kólikterin satyp, aqshalaryn joǵaltyp jatyr. Nege? Sebebi krıptovalıýta naryǵyn durys bilmeıdi. Sol bilimsizdikten halyq shyǵynǵa batyp jatyr. Sondyqtan Ulttyq bank teledıdar arqyly, gazetter arqyly qazaqstandyqtardyń qarjylyq saýattylyǵyn, ásirese, krıptovalıýtaǵa qatysty bilimin kóterip otyrýy qajet. Sebebi alaıaqtar adamdardy aldaıdy», - dedi Á.Jıenbaeva «QazAqparat» HAA tilshisine bergen suhbatynda.
Onyń aıtýynsha, krıptovalıýta naryǵyn tezdetip baqylaýǵa alý qajet. Áıtpese, aldanǵan azamattardyń narazylyǵy kúsheıip ketýi ábden múmkin.
«Men ózim krıptovalıýta naryǵyn retteý kerek dep sanaımyn. Sebebi búgin ol - «bıtkoın», erteń taǵy birdeńe shyǵady. Mysaly, Avstralııada krıptovalıýtaǵa ruqsat berdi. Alaıda memleket tarapynan qadaǵalap otyrady. Sondyqtan Ulttyq bank osy salany qadaǵalaýy qajet, tıisti retteý normalaryn jasaý kerek. Qandaı kompanııalar kele alady? Akkredıtatsııa qandaı bolady? Onsyz men de qazir óz krıptovalıýtamdy ótirik shyǵaryp, qarapaıym halyqtyń aqshasyn jınap, basqa elge kóship kete alamyn. Bitti. Odan keıin meni kim tabady? Sondyqtan qazir Ulttyq bankke osy máselemen aınalysý qajet. Sebebi erteń úlken shý bolady», - dep atap kórsetti Á.Jıenbaeva.
