Krıptovalıýtamen zańsyz aınalysqan 130 alańnyń qyzmeti toqtatyldy

ASTANA. KAZINFORM – Qarjylyq monıtorıng agenttigi krıptovalıýtamen baılanysty kóleńkeli operatsııalarǵa qarsy júıeli jumys júrgizip keledi.

Agenttik málimetinshe, ınternet-alaıaqtyq jáne esirtki saýdasynan túsken kiristerdi jylystatý úshin paıdalanylǵan 130 zańsyz krıptobırjanyń qyzmeti toqtatylǵan.

Tergep-tekserý barysynda 16,7 mln USDT somasyndaǵy tsıfrlyq aktıvterge tyıym salyndy.

- Qarjy jylystatý shemasynda qylmyskerler aqshany bank shottaryna nemese krıptovalıýta aıyrbastaý qyzmetin kórsetetin ámııandarǵa aýdarady. Keıin qarajat konvertatsııalanyp, qarjylyq operatsııalar tizbegi arqyly onyń shyqqan kózi jasyrylady. Zańsyz tabysty «tazartý» úshin arnaıy aqy alynady.

Mundaı operatsııalar kezinde kóbine dropperlerdiń bank kartalary men ámııandary paıdalanylady. Osylaısha, zańsyz krıptoaıyrbastaý alańdary kóleńkeli qarjy aınalymyna qatysyp, qarajatty qolma-qol aqshaǵa aınaldyrý jáne shetelge shyǵarý arqyly «kásibı jylystatýshylar» retinde áreket etedi, - dep túsindirdi vedomstvodan.

Qarjylyq monıtorıng agenttigi azamattarǵa tsıfrlyq aktıvterdi aıyrbastaý kezinde zań aıasynda jumys isteıtin, resmı tirkelgen jáne lıtsenzııalanǵan provaıderlerdi ǵana paıdalanýdy usynady.

Lıtsenzııasy bar krıptobırjalardyń tizimimen AHQO-nyń resmı saıtynda tanysýǵa bolady.

Vedomstvo zańsyz shemalarǵa qatysý qylmystyq jaýapkershilikke ákeletinin eskertedi.

Aıta keteıik, Ulttyq bank krıptorezerv tujyrymdamasyn ázirlep jatyr.