Krıptovalıýtalardy aıyrbastaıtyn uıymdar qurylady – Qarjy naryǵyn retteý agenttigi
ASTANA. KAZINFORM – Bankterge tsıfrlyq tehnologııalar, jasandy ıntellekt jáne telekommýnıkatsııa salalarynda enshiles kompanııalardy qurý jáne satyp alý quqyǵy beriledi. Bul týraly Májilistiń jalpy otyrysynda bank qyzmeti týraly zań jobasyn tanystyrǵan Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.
- Zań jobasy aıasynda tsıfrlyq aktıvterdiń basqa túrin retteý kózdelgen. Bul qamtamasyz etilmegen tsıfrlyq aktıvter, ıaǵnı - krıptovalıýtalar. Krıptovalıýtalardy aıyrbastaıtyn uıymdardy qurý kózdeledi. Olardyń qyzmetine Ulttyq bank lıtsenzııa beredi jáne retteıdi. Investorlardy qorǵaý úshin Ulttyq bank aınalysqa ruqsat etilgen krıptovalıýtalardyń tizbesin, sondaı-aq krıptovalıýta aıyrbastaýshylardyń operatsııalary boıynsha lımıtter men shekteýlerdi belgileıtin bolady, - dedi agenttik basshysy.
Onyń atap ótýinshe, kiristerdi jylystatýǵa jáne terrorızmdi qarjylandyrýǵa qarsy is-qımyl maqsatynda krıptovalıýta aıyrbastaýshylar men tsıfrlyq aktıvter naryǵynyń ınfraqurylymdyq qatysýshylary qarjylyq monıtorıng sýbektileriniń tizbesine engiziledi.
- Sondaı-aq zań jobasynda bankterdiń ekojúıeler aıasynda ınnovatsııalyq qarjy ónimderin damytý, bank qyzmetine ozyq tehnologııalardy engizý jáne bankterdiń básekege qabilettiligin arttyrý úshin qarjylyq-tehnologııalyq kompanııalardyń kapıtalyna ınvestıtsııalaý múmkindikteri keńeıtiledi. Bankterge tsıfrlyq tehnologııalar, elektrondyq kommertsııa, kıberqaýipsizdik, bıometrııa, jasandy ıntellekt jáne telekommýnıkatsııa salalarynda enshiles kompanııalardy qurý jáne satyp alý quqyǵy beriledi, - dedi Mádına Ábilqasymova.
Agenttik tóraǵasynyń aıtýynsha, bankterdiń enshiles uıymdary sheteldik qarjy jáne lızıngtik kompanııalarǵa ınvestıtsııa sala alady. Enshiles saqtandyrý uıymdaryna sheteldik saqtandyrý brokerlerin, medıtsınalyq mekemelerdi qurýǵa jáne halyqaralyq saqtandyrý sındıkattaryna qatysýǵa ruqsat etiledi.
- Zań jobasynda túzetýlerdiń edáýir blogy ulttyq tsıfrlyq qarjy ınfraqurylymyn jańǵyrtýǵa baǵyttalǵan. Oǵan ashyq bankıng júıesi, mobıldi tólemder men tólem kartochkalary júıesi, ulttyq tólem júıesi, sáıkestendirý derekterin almasý ortalyǵy jáne tsıfrlyq teńge kiredi. Tsıfrlyq teńgeniń ulttyq valıýtanyń jańa nysany retindegi mártebesi zańnamalyq túrde bekitiledi. Tsıfrlyq teńgeniń aınalysy jáne ony paıdalaný tártibin Ulttyq bank aıqyndaıdy, - dedi ol.
Buǵan deıin el aýmaǵynda tsıfrlyq qarjy aktıvteriniń aınalymyna ruqsat berilýi múmkin ekenin jazǵan edik.