Krıptovalıýtaǵa ınvestıtsııa salýǵa bola ma — UB tóraǵasynyń jaýaby

ASTANA. KAZINFORM — Krıptovalıýtanyń túsinikti, qarapaıym qural bolýdan aýyly áli alys. Bul týraly Ulttyq bank tóraǵasy Tımýr Súleımenov aıtty.

— Krıpto, krıptovalıýta degendi jıi estigen kezde adamdardyń boıynda ol sıqyrly taıaqsha sııaqty, ınvestıtsııa salý kerek, bári jaqsy bolady degendeı áser qalyptasady. Oǵan túrli alaıaqtar men pıramıdalar da túrtki bolyp otyr. Osy oraıda paıdalanyp, qalaı degende de bul aktıv qarjylyq turǵyda da, ashyqtyǵy, tutynýshylardyń quqyǵyn qorǵaý turǵysynda da barynsha kúrdeli ekenin aıtqym keledi. Ol depozıt sııaqty emes. Bankke baryp depozıt ashasyń, saǵan 3 aı, 1 jylǵa mólsherleme belgileıdi. Ol jerde bári túsinikti jáne bári soǵan úırenip qalǵan. Krıptovalıýtanyń túsinikti, qarapaıym qural bolýdan aýyly áli alys, — dedi ol.

UB tóraǵasynyń paıymynsha, krıptovalıýtamen ne qalaıtynyn, ony qalaı qalaıtyndyǵyn jaqsy biletin tájirıbeli ınvestorlar aılanysýy tıis.

— Al qarapaıym, orta ınvestor ony depozıt retinde qarastyrmaýy tıis. Bul sizdiń quqyǵyńyz, tańdaýyńyz. Degenmen, eń aldymen materıaldyq bóligin zerdelep alyp, sodan keıin ınvestıtsııa salǵan jón sııaqty, — dedi Tımýr Súleımenov.

Buǵan deıin krıptovalıýtany azyq-túlik satyp alýǵa múmkindik beretin SryptoCity jobasy iske qosylatyndyǵyn jazǵan edik.