Krıptovalıýtaǵa ınvestıtsııa salý qanshalyqty tıimdi
«Krıptovalıýtany kim kóringen jasaı alady. Olardyń basym bóliginiń jaqsy irgetasy, sapaly tehnıkalyq bazasy joq. Olardy oılap taýyp, eleń etkizerlik at qoıady da aınaldyryp, baǵasyn kóteredi. Al sodan keıin «sekirip» ketedi. Sońynan sekirgender utylyp, birinshi shyǵyp ketkender tabysqa keneledi. Bul da qarjy pıramıdasy sııaqty ǵoı. Degenmen, úlken komanda jumys isteıtin negizgi birneshe krıptovalıýta bar. Olar naryqta 14 jyl qoldanysta ári ózderiniń blokcheın tehnologııasyn qosymsha, baǵdarlamalyq qamtamasyz etý, Play To Earn oıyndary arqyly qalyptastyrady. Olardyń ózindik jasqy bazasy bar. Oǵan efırıým, bıtkoın jatady. Menińshe, tek osylardy ǵana qarastyrýǵa bolady. Eger siz bul salada sarapshy bolmasańyz, onda qalǵandaryn múldem umytý kerek», - deıdi sarapshy.
Onyń atap ótýinshe, valıýtaǵa ınvestıtsııa jasaý jaıynda aıtqan kezde túrik lırasy nemese nepal rýpıi emes, dollar jaıynda ǵana sóz bolady.
«Dollar da bıtkoın sııaqty. Al qazaqstandyq teńge qalǵan elderdiń bárinde qabyldana bermeıdi. Krıptovalıýta óziniń júıesinde ǵana qabyldanady jáne ol qoǵamdastyq shaǵyn ǵana bolsa, onda ondaı krıptovalıýtaǵa ıelik etýdiń esh máni joq. Bárine birdeı pıtstsa satyp ala bermeısiń. Al eger álem halqynyń 30 paıyzy qoldanatyn krıptovalıýtaǵa ıelik eter bolsańyz, onda ol qundy bola túsedi ári oǵan kez kelgen zatty satyp ala alasyz. Osy turǵydan alǵanda efırıým men bıtkoın qundy, al qalǵanynyń esh quny joq», - dep atap ótti Álibek Jalǵasbaev.
Sonymen qatar ol ótken jyldyń sońynda 68 myń dollardan asyp jyǵylǵan bıtkoınnyń búginde 23 myń dollarǵa deıin quldyraý sebebin túsindirip berdi.
«Bıtkoın paıda bolǵan sátten bergi jaıt áli de qaıtalanyp keledi. Ár ýaqytta da ol shyrqaý shegine jetkennen keıin 70 paıyzǵa deıin qulaıdy. Alǵash ret mundaı jaıt bıtkoın shamamen 10-20 dollar turǵan kezde boldy. Sol kezde 6 dollarǵa deıin qunyn joǵaltty-aý deımin. Kelesi joly ol 1 myń dollarǵa deıin kóterilip, 400 dollarǵa, odan soń 19 myń dollardan 3 myń dollarǵa quldyrap ketti. Bul - sanmen alǵanda óte úlken quldyraý sanalady. Qazir ol 60 myń dollardan 18 myńǵa deıin qulady. Osyndaı jaıt bolyp jatyr jáne bul bıtkoınnyń nasharlyǵynan emes. Adamdarda qorqynysh paıda boldy jáne olar sata bastady. Boıyńyzdy qorqynysh bılegende odan qutylyp, qaraqumyq pen dárethana qaǵazyn satyp alǵyńyz keledi», - dedi ol.