Krıptovalıýtadan túsken salyqtar: Qazaqstan bıýdjetine qansha qarajat tústi

ASTANA. KAZINFORM — QR Qarjy mınıstrligi Memlekettik kirister komıteti (MKK) krıptovalıýta operatsııalarynan el bıýdjetine qansha qarajat túskenin jarııa etti, dep jazdy Kazinform agenttiginiń tilshisi.

MKK derekterine sáıkes, krıptovalıýta naryǵyna qatysýshylardan túsken salyqtyq túsimder kólemi:

• 2023 jyly — 7,4 mlrd teńge;

• 2024 jyly — 9,8 mlrd teńge;

• 2025 jyldyń basynan 22 qyrkúıekke deıin — 13,1 mlrd teńge boldy.

Buǵan deıin MKK-nyń Tsıfrlyq aktıvterdi ákimshilendirý basqarmasynyń basshysy Talǵat Ádilov baspasóz máslıhatynda elimizde krıptovalıýtaǵa salyq bar ekenin jáne ol birneshe jyldan beri ákimshilenip kele jatqanyn aıtqan bolatyn.

— Bul — tsıfrlyq aktıv. Biz ony eseptep otyrmyz. 2022 jyldan bastap ol naqty zańnamamen rettelip keledi. Buǵan deıin, eger salyq tóleýshi krıptovalıýta operatsııalarynan tabys alsa, bul tabys salyq kodeksinde «basqa tabys» retinde esepteletin, jáne ony salyq tóleýshi ózi deklaratsııalaýy tıis bolatyn. Buryn bul — 240-nysan boıynsha esep beriletin, — dep túsindirdi Talǵat Ádilov.

Eske salaıyq, Memleket basshysy Qazaqstan halqyna Joldaýynda Ulttyq bank bazasynda Tsıfrlyq aktıvterdiń memlekettik qoryn (krıptorezerv) qurýdy tapsyrǵan bolatyn.

Ulttyq bank bul baǵytta ýákiletti memlekettik organdarmen birlesip krıptorezerv tujyrymdamasyn ázirlep jatqanyn habarlady. Tujyrymdamada qordy qalyptastyrý kózderi, jınaqtaý jáne paıdalaný mehanızmderi, sondaı-aq táýekelderdi basqarý tásilderi men aktıvterdiń táýekeldik profılin aıqyndaý máseleleri qarastyrylyp jatyr.