Krıptovalıýta naryǵy nazardan tys qalmaıdy – Ulttyq bank

NUR-SULTAN. QazAqparat – Elimizde krıptovalıýta naryǵy nazardan tys qalmaıdy. Bul týraly Ulttyq bank tóraǵasy Ǵalymjan Pirmatov málim etti, dep habarlaıdy QazAqparat tilshisi.

Búgin elordada ótken baspasóz máslıhatynda tilshiler Ulttyq bank tóraǵasynan krıptovalıýta salasyn retteý boıynsha sheshim qabyldaý múmkindigine qatysty saýal qoıdy.

«Krıptovalıýta jóninde Ulttyq bank sheshim qabyldaýdy keshiktirip jatqan joq pa? Bul saladaǵy talqylaýlar qashanǵa deıin sozylady? Krıptovalıýtany zańdastyrý úshin qandaı qujattar qabyldaý kerek bolady?», - dep surady tilshiler.

«Ulttyq bank sheshimi keshigip jatyr dep sanamaımyn. Álemdegi basqa da ortalyq bankter men qarjy salasyn retteýshiler sekildi biz de bul máseleni tyńǵylyqty zerttep jatyrmyz. Bul turǵyda ahýal jekeleı ári ortalyqsyzdandyrylǵan qarjyǵa baılanysty bolyp tur. Osy baǵytta bizdi ınnovatsııalardyń múmkindikteri qyzyqtyryp otyr. Atap aıtqanda, tek maıner nemese qandaı da bir jeke qurylym qyzyqtyrmaıdy. Bul salada osy jańa tehnologııalar qamtamasyz ete alatyn ınnovatsııalar jónindegi jańa múmkindikterdiń mańyzy zor. Sondyqtan bizdiń sheshim turaqtylyq pen qarjy qyzmetterin paıdalanatyndardyń múddelerine teris áserin tıgizbes úshin egjeı-tegjeıli talqylaýdy jalǵastyramyz», - dedi Ǵ.Pirmatov.

Osy oraıda, ol bul másele tyńǵylyqty pysyqtalǵannan keıin sheshim qabyldanatynyn aıtty.

«Biz bul naryqty nazardan tys qaldyrmaımyz. Atalǵan tehnologııalar aıasynda usynylyp otyrǵan ınnovatsııalar áleýeti boıynsha barynsha paıda tabýdy kózdep otyrmyz», - dedi Ǵ. Pirmatov.

UB basshysy mamandar bul salany zertteýdi júrgizip jatqanyn, krıptovalıýtaǵa baılanysty sheshimderdi aldaǵy ýaqytta jarııalaıtynyn atap ótti.

Budan buryn habarlanǵandaı, maýsymnyń sońyna deıin tsıfrlyq teńgege qatysty tıisti ádisteme jarııalanady.