Krıptovalıýta naryǵy ıpoteka sııaqty ýshyǵyp ketýi ábden múmkin - depýtattar
ASTANA. QazAqparat - Búgin Parlament Májilisinde «Valıýtalyq retteý jáne valıýtalyq baqylaý týraly» zań jobasy tanystyryldy. Alaıda krıptovalıýta jaıynda eshteńe aıtylmady. Osyǵan baılanysty depýtattar krıptovalıýta naryǵyn tezdetip baqylaýǵa alýdy talap etti, dep xabarlaıdy QazAqparat tilshisi.
Depýtat Gleb Şegelskıı buǵan deıin krıptovalıýta naryǵyn baqylaýǵa qatysty eki ret depýtattyq saýal jiberilgenin jetkizdi. Sebebi aldanǵan azamattar úleskerler sııaqty memleketten kómek suraýy ábden múmkin. «Sol kezde Ulttyq bank qaıtadan aqsha suraıdy. Depýtattar bolsa, xalyqty aralap, túsindirý jumystaryn júrgizýge májbúr bolady. Búgin Oleg Aleksandrovıch (Ulttyq banktiń orynbasary - avt.) krıptovalıýtany keńinen qarastyrý qajet dep jatyr. Ony keńinen qarastyryp qaıtemiz? Qazirdiń ózinde Qarjy mınıstrligi kóz aldyńyzda krıptovalıýtaǵa maınıng jasap júr. Endi, olardy ne úshin jaýapkershilikke tartatynymyzdy bilmeımiz. Sebebi naqty zańnama joq. Siz bolsańyz, keńinen qarastyrý qajet deısiz», - dedi G.Şegelskıı.
Depýtat Gúljan Qaraǵusova da atalǵan máseleni tezdetip sheshý kerek ekenin eskertti. Sebebi krıptovalıýta máselesi ýshyǵyp ketse, úleskerler problemasynan kem bolmaıdy. «Áli esimizde, 2004 jyly men mınıstr boldym. Sol kezde biz bir top depýtattarmen birge ıpoteka máselesin kótergen edik. Úleskerler máselesi ýshyǵýy múmkin dedik, ıpoteka kópirshik sııaqty jarylady dep eskerttik. Joq, Ulttyq bank bárin baqylaýda ustap otyr, protsenttik mólsherleme jaqsy, qaryz joq dedi. Alaıda artynan úleskerlermen kim sóılesti? Biz - depýtattar. Úkimet te, Ulttyq bank te aralasqan joq. Qazirdiń ózinde biz qabyldaýdy ótkizgende krıptovalıýtaǵa qatysty aryzdar túsip jatyr. Osynyń ózi problemanyń ýshyǵyp bara jatqanyn kórsetse kerek», - dep atap kórsetti G.Qaraǵusova. Zań jobasyn talqylaý barysynda depýtattar osy máselege qatysty óz usynystaryn engizetin boldy.
Aıta keteıik, búgin QR Ulttyq bank tóraǵasynyń orynbasary Oleg Smolıakov depýttattarǵa «Valıýtalyq retteý jáne valıýtalyq baqylaý týraly» zań joasyn tanystyrdy. Onyń aıtýynsha, aldaǵy ýaqytta altyn quımalar valıýta aıyrbastaý beketterinde satylady.
