Krıptovalıýta men altyn saýdasyna ınvestıtsııa salǵan aqtóbelik 18 mln teńgesinen aıyryldy
AQTÓBE. KAZINFORM – Zańger bir jarym jyl boıy aqsha aýdaryp otyrǵan. Polıtsııaǵa aryz jazǵannan soń eki kúdikti ustaldy.
Aqtóbede krıptovalıýta men altyn saýdasyna ınvestıtsııa salyp, mol tabysqa kenelmek bolǵan 46 jastaǵy zańger aldanyp qaldy. Ol ózi tanymaıtyn eki adammen baılanysqa shyǵyp, bir jarym jyl boıy aqsha aýdaryp otyrǵan. Sóıtip shyǵyny 18 mln teńgege jetkende ǵana polıtsııadan kómek surady.
- Jedel-izdestirý is-sharalarynyń nátıjesinde polıtsııa qyzmetkerleri eki kúdiktiniń kim ekenin anyqtap, polıtsııa bólimine jetkizdi. Aldyn ala málimetter boıynsha, kúdiktilerdiń ınvestıtsııalyq qyzmetke eshqandaı qatysy bolmaǵan. Al jábirlenýshiden alǵan aqshany óz qajettilikterine jumsaǵan. Atalǵan derek boıynsha Qylmystyq kodekstiń «Alaıaqtyq» baby boıynsha tergep-tekserý júrgizilip jatyr,- dedi Aqtóbe oblystyq PD baspasóz qyzmeti.
Aıta keteıik, 2 jylda elde krıptovalıýtanyń aınalymyna baılanysty myńnan astam qylmystyq is tirkelgen. Onyń 60% — alaıaqtyq faktileri, 25% — krıptovalıýta aıyrbastaý pýnktteriniń zańsyz qyzmeti, al 15% — tsıfrlyq aktıvter arqyly qylmystyq tabysty zańdastyrý jaǵdaılary.
